ATAÚRU, 16 maiu 2023 (TATOLI) – Prezidente Partidu Congresso Nacional Reconstrucão de Timor (CNRT), Kay Rala Xanana Gusmão, deklara prontu atu sai primeiru ministru hodi lídera governu IX atu implementa programa sira ne’ebé interrese nasionál, hodi salva riku-soin nasaun nian.
“Ha’u prontu sai primeiru ministru hodi salva Timor-Leste nia soberania no mós rekursu naturál hanesan mina iha tasi-laran,’’ Prezidente Partidu CNRT, Kay Rala Xanana Gusmão hateten iha nia intervensaun polítika iha komísiu kampaña iha munisípiu Ataúru, suku Vila Mau-Meta, tersa nee.
Tuir Líder nasionál ne’e, membru governu sesante sira seidauk reflete ba programa interrese nasionál ne’ebé mak fó benefísiu ba povu tomak, tanba ne’e CNRT kompromete sei kontinua luta ba soberania Estadu, hodi manan dignidade nasaun nian.
“Iha esforsu barak ita halo ona maibé seidauk másimu, tanba ne’e CNRT hakarak dala ida tan husu apoiu ba povu tomak hodi fó votus maioria hodi kontinua luta ba dignidade soberania nasaun ida ne’e nian, ho Austrália,’’ Xanana subliña
Vise Presidente Partidu CNRT, Gil Oan soruk hateten nasaun Timor-Leste presiza lideransa ida komprometidu ba nasaun ne’e no prontu serbí ba rai no povu, tanba ne’e bainhira ukun rai tenke reflete ba interrese nasionál no fó moris di’ak ba povu tomak.
“Ita triste hodi haree situasaun atuál ne’ebé mak sakrifika joven sira-nia vida, iha insidente balun iha Dili laran, joven sira oho malu ne’ebé prejuízu tebes ba dezenvolvimentu nasaun nian,’’ nia hateten
Enkuantu, Koordenadór CNRT munisípiu Ataúru husu ba militante no simpatizante sira iha munisípiu Ataúru, fó konfiansa ba partidu CNRT ho númeru sorteiu 12 atu bele realiza programa importante hirak ne’ebé reflete ba povu nian moris di’ak.
Alende tau prioridade ba interrese nasionál, CNRT mós sei tau prioridade ba programa xave sira hanesan turizmu no peska, hodi kontribui ba diversifikasaun Ekonomia iha Ataúru.
Jornalista: José Belarmino De Sá
Editora: Nelia Borges
