DILI, 23 maiu 2023 (TATOLI)–Diretór Sekretariadu Tékniku Administrasaun Eleitorál (STAE), Acilino Manuel Branco, hateten STAE nia responsabilidade ramata ona no hahú ohin ne’e, Komisaun Nasionál Eleisaun (CNE) mak sei kontinua halo verifikasaun ba votu reklamadu sira.
Notísia Relevante: Rezultadu kontajen finál iha STAE, CNRT hetan vitória iha Elpar 2023
“Tuir lei eleisaun parlamentár nian katak votu nulu sei hela ho STAE munisípiu sira hotu no mós rejionál. Maibé votu reklamadu sira iha ona urna laran ne’ebé tuir lei tenke lori sai iha sentru apuramentu nasionál depois CNE uza nia kompeténsia hodi halo apresia no halo desizaun,” nia dehan ba jornalista sira iha konferénsia imprensa, iha salaun STAE Caicoli, Dili, tersa ne’e.
Nune’e, nia dehan, STAE hakarak agradese ba parte hotu nia kontribuisaun no apoiu hahú iha transportasaun materiál eleisaun sensitivu no la’ós sensituvu ba munisípiu mai to’o kontajen votu munisipál no rejionál.
“Hanesan diretór jerál STAE agradese ba parte hotu tanba ho kontribuisaun sira mak ita haree no akompaña festa demokrásia ne’e ho di’ak no susesu. Tanba, ita haree hosi taxa partipasaun kompara ho eleisaun prezidensiál kuaze 80%, iha fatin seluk eleisuan prezidensial kuaze 73% to’o 75%. Signifika iha aumenta taxa partisipa ne’ebé sa’e makaas,” nia dehan.
Nia dehan, eleitór elizivél hodi partisipa iha eleisaun 21 maiu 2023 hamutuk 890.145, kompostu hosi mane 472.316 no feto iha 427.829.
Totál eleitór ka votante iha territóriu nasionál no diáspora hamutuk 705.693 (79,28%) ne’ebé kompostu hosi mane iha 362.415 no feto iha 343.278.
“Eleitór ne’ebé mak la marka prezensa iha fatin eleisaun 184.452 (20,72%), mak la vota iha eleisaun parlamentár 2023,” nia dehan.
Hosi votu hirak ne’e hetan votu nulu hamutuk 10.202, votu reklamadu 515, votu rezeitadu 58, votu branku 2.693, votu abandonadu 24 no votante ne’ebé vota ona hamutuk 795.583 (80,3%) hosi totál eleitór iha territóriu nasionál 890.145.
Jornalista : Osória Marques
Editór : Cancio Ximenes
