COVALIMA, 06 juñu 2023 (TATOLI)–Governu liuhosi Ministériu Solidariedade Sosiál no Inkluzasaun (MSSI) hamutuk ho autoridade lokál Covalima, tersa ne’e, realiza abertura ofisiál pagamentu bolsa da mãe jerasaun foun faze daruak iha munisípiu Covalima.
Notísia Relevante: Governu hahú rejista benefisiáriu bolsa da mãe jerasaun foun iha Covalima
“Ohin, realiza abertura ofisiál pagamentu bolsa da mãe jerasaun foun ba faze daruak ne’ebé prosesu progamentu hala’o iha sentru saúde Suai, postu administrative Suai, iha munisípiu covalima”, Diretór Jerál Ministériu Solidariedade Sosiál no Inkluzasaun (MSSI), Florêncio Pina Dias Gonzaga, hateten liuhosi diskursu ba abertura ofisiál pagamentu bolsa da mãe jerasaun foun faze daruak, iha sentru saúde Suai.
Programa bolsa da Mãe jerasaun foun mak programa asisténsia sosiál ne’ebé estabelese ho dekretu-lei númeru 22/2021, 10 novembru, no programa ne’e hahú ona iha munisípiu Ainaro, Bobonaro no RAEOA iha tinan 2022.
Ho nune’e, iha tinan 2023, Governu liuhosi MSSI hala’o pagamentu faze daruak iha munisípiu Liquiça, Manatuto, Viqueque no Covalima.
Benefisiáriu ba programa bolsa da mãe jerasaun foun mak hanesan inan isin-rua no labarik sira ho tinan 0-3 mak simu pagamentu ba subsídiu asisténsia sosiál hodi hadi’a saúde no nutrisaun iha munisípiu Covalima.
Prosesu pagamentu no alvu pagamentu faze daruak ba programa bolsa da mãe jerasaun foun ne’e, fasilita liuhosi Mosan, maibé pagamentu faze dahuluk pagamentu fasilita hosi T-PAY.
Implementasaun programa bolsa da mãe jerasaun foun hahú lansau iha fulan-juñu to’o marsu 2023 ho númeru benefisíariu ne’ebé rejista no aprovadu hosi munisípiu neen (6) inklui RAEOA hamutuk na’in-35,130 ba subsídiu inan isin-rua, labarik no labarik difisiénsia sira.
Hosi totál hamutuk 35,130 ne’e, iha benefisiáriu hamutuk 13,254 mak sei hetan pagamentu dahuluk liuhosi mosan no 13,786 sei kontinua hetan pagamentu liuhosi TPAY.
Pagamentu bolsa da mãe jerasaun foun ba faze daruak nian, Governu hahú hala’o lansamentu iha munisípiu sira hanesan Covalima, Liquiça, Manatuto no Viqueque.
Programa bolsa da mãe jerasaun foun mak programa transferénsia osan hosi sistema asisténsia sosiál ne’ebé kompostu ba subsídiu ba inan isin-rua $15.00 kada fulan, sira durante periódu kous kada fulan $20.00 ba labarik tinan 0-3 sei kontinua to’o labarik tinan neen ho suplementu adisionál $10.00 bainhira labarik moras króniku ka difisiénsia.
Subsídiu bolsa da mãe jerasaun foun mós fornese akollamentu kona-ba saúde hosi pesoál saúde sira inklui ba kuida saúde durante períodu isin-rua, períodu primeiru infánsia inklui imunizasaun hahan nutritivu ba família no prátika ijéniku no sanitasaun.
Tuir dadus, foin hahú benefisáriu ba programa bolsa da mãe jerasuan foun iha munisípiu Covalima hamutuk 3000-resin ho nia orsamentu $83,165 hodi distribui ba inan isin-rua no labarik sira.
Reprezentante Sekretáriu Adminitrasaun Munisípiu Covalima, Quintino da Costa, hato’o agaradesimentu ba VIII Governu Konstituisionál hodi halo mudansa ba programa bolsa da mãe jerasaun foun.
“Ita halo mudansa programa bolsa da mãe jerasaun foun ho razaun liuhosi estudu hosi Governu no Agência halo ita-nia oan sira má nutrisaun makaas iha Timor-Leste inklui mós Covalima. Ho programa ida-ne’e, bele fó kbiit ba inan sira no família,” nia dehan.
Ho programa ida-ne’e halo investimentu ba labarik tanba labarik mak futuru nasaun, tanba ne’e iha Covalima tékniku sira destaka ona postu saúde hotu atu servisu hamutuk ho pesoál saúde hodi halo atendimentu direita ba inan isin-rua sira.
Diretór Sentru Solidariedade Sosiál Covalima, Agapito Asis, fó sai dadus benefisíariu ne’ebé mak asesu ba programa bolsa da mãe jerasaun foun iha munisípiu Covalima hanesan inan isin-rua hamutuk 842, labarik 4377 no labarik ho difisiénsia hamutuk 20.
Benefisiáriu 7.875
Entretantu, Diretór Nasionál Asisténsia Sosiál (DNSA), Lucas Tois, hateten iha abertura ba lansamentu ba bolsa da mãe jerasaun foun iha munisípiu Covalima, Manatuto, Liquiça, ho Viqueque ho pagamentu simultanea ba ba benefisiáriu 7.875.
Hosi benefisiáriu 7.875 ne’e, nia dehan, iha munisípiu Covalima iha benefisiáriu programa bolsa da mãe jerasaun foun neé hamutuk 2.076, Liquiça hamurtk 2.449, Manatuto hamutuk 1.494 no Viqueque hamutuk 1.856.
Maibé, totál benefísiariu aprovadu iha 12 abríl 2023 ne’e hamutuk 13.254, no hosi totál ne’e iha benefisiáriu 5.424 mak sei suspende tanba benefisiáriu nia telefone fora da área kobertura.
“Entaun ami seidauk bele halo pagamentu ba benefisiáriu 5.424 tanba ami presiza verifika no halo konfirmasaun ho MSSI, nune’e Mosan labele halo pagamentu no suspende tiha benefísiu sira-ne’e. Bainhira kompleta ona mak kontinua fali pagamentu,” nia hateten.
Tanba ne’e, MSSI husu ba benefisiáriu sira-ne’ebé mak troka sim card Telemor karik kuidadu, nune’e labele prejuduka fali pagamentu tanba benefisiáriu nia sim card ne’e hanesan konta bankária ne’ebé mak empreza Mosan uza hodi selu.
“Karik ita-boot sira-nia sim card lakon hateten ba ekipa rejistu MSSI nian destaka iha munisípiu,” nia dehan.
Jornalista : Celestina Teles
Editór : Cancio Ximenes
