DILI, 14 juñu 2023 (TATOLI)—Diretór Nasionál Agro-Komérsiu no Kooperasaun iha Setór Privadu, Fernando Egidio Amaral, husu Governu foun halo reforma instituisionál iha parte Ministériu Agrikultura no Peska (MAP).
“Ita presiza halo reforma konstituisionál tanba hakarak kapasita di’ak liután ita-nia funsionáriu sira no envolve ékniku profesionál agríkola sira tanba ita investe iha tinan-20 nia-laran ona maibé to’o agora sira la hatene sira-nia diresaun atu bá ne’ebé loos, entaun envolve sira no tau iha munisípiu hotu atu reforsa polítika dezentralizasaun iha munisípiu, liu-liu área ekonomia ninian,” Diretór hateten ba Agência Tatoli liuhosi programa entrevista eskluziva iha estúdiu Farol, foin lalais ne’e.
Notísia relevante : Xefe Governu husu Lautém-oan aumenta produsaun ai-han rai-laran
Fernando Egidio dehan, MAP nia planu estratéjiku hasa’e produtu aliementasaun iha rai-laran hodi hamenus produtu importasaun, nune’e iha tempu badak bainhira mosu ona IX Governu, espera membru Governu foun ne’ebé mai iha kbiit tomak halo reforma instituisionál, liu-liu atu deskonsentra rekursu umanu sira atu labele fó todan ba orsamentu Estadu ba gastu sira ne’ebé mak la nesesáriu.
Envolve mós tékniku profesionál agríkola iha munisípiu hotu atu reforsa polítika dezentralizasaun.
“Hakarak munisípiu hotu iha ona sentru ekselente tanba liuhosi sentru ne’e mak ita forma agrikultór no indústria kiik sira, bainhira ita fó formasaun karik liu de’it ona haruka sira bá serbisu mak ita fó asisténsia téknika de’it, nune’e bele hasa’e produsaun ai-han iha rai-laran hodi hamenus produtu importasaun,” nia tenik.
Aleinde ne’e, presiza tékniku profisionál tanba iha parte agríkola, nune’e presiza garante rekursu umanu profisionál hodi bele garante asisténsia servisu públiku ba setór agrikultura.
“Atu hamenus depedénsia produtu importasaun, durante ne’e MAP ninia knaar ida mak apoiu harii grupu no asosiasaun sira hodi hasa’e produsaun, iha parte produsaun ita tulun sira bele liga ba merkadu,” Diretór esplika.
Nune’e, nia husu ba membu Governu foun mai presiza rezolve problema konetividade área rurál no urbana, nune’e bele faslita agrikultór no indústria kiik sira bele asesu ba merkadu fa’an produtu.
Jornalista : Arminda Fonseca
Editora : Julia Chatarina
