DILI, (TATOLI) – Ministru Transporte no Komunikasaun, José Agostinho da Silva, hatete Governu japaun sei responsabiliza iha komponente lima ba konstrusaun aeroportu internasionál Nicolau Lobato Komoro ho totál orsamentu pur volta milliaun $45 iha tinan 2020.
“Governu Japaun aloka orsamentu milliaun $45 ba komponente lima, primeiru maka terminál ba pasajeiru sira, tore kontrolu, tax way, access road, no fatin para aviaun”, katak nia ba jornalista sira hafoin sorumutu ho Primeiru-Ministru, Taur Matan Ruak, iha Palásiu Governu, loraik ne’e.
Governu rai rua, tuir planu sei estabele konkordánsia formál kona-ba projetu ne’e iha maiu 2019 no dezembru tinan ne’e kontinua loke konkursu ba públiku, tanba konstrusaun sei implementa iha marsu 2020.
Mesmu hetan ona apoiu hosi Governu Japaun ba konstrusaun ne’e maibé hosi parte Timor-Leste mós iha responsabilidade, liuliu kontrusaun ba estensaun pista to’o metru rihun tolu ka kilometru tolu tuir planu asaun Governu da-ualu nian. “Governu nia responsabilidade maka atu aumenta pista no kontrusaun lampu”, dehan tan.
Maibé governu seidauk deside bainhira maka atu implementa responsabilidade hosi parte governu nian, tanba sei presiza estudu viabilidade hodi laiha dupla orsamentu ba projetu ne’e.
“Komponente hirak ne’e governu bele finansia mesak ka dalan nakloke ba parseiru dezenvolvimentu sira ne’ebé hakarak investe”, afirma.
Jornalista: Agapito dos Santos
Editora: Rita Almeida
