DILI, 30 juñu 2023 (TATOLI)-–Prezidente Repúblika, José Ramos Horta, hateten, Primeiru-Ministru, Taur Matan Ruak, disponível apoia governasaun ne’ebé lidera hosi Kayrala Xanana Gusmão.
“Iha enkontru ruma presiza rona Primeiru-Ministru, Taur Matan Ruak nia opiniaun, katak nia prontu para ajuda,” Prezidente Horta hateten hafoin reuniaun ho Primeiru-Ministru, Taur Matan Ruak ho Primeiru-Ministru indijitadu, Xanana Gusmão, iha Palásiu Prezidensiál, Bairru-Pité, sesta ne’e.
Xefe Estadu informa, serimónia hand over sei hala’o iha ámbitu tomada pose IX Governu Konstitusionál, iha sabádu (01/07) no iha ne’ebá sei iha relatóriu hosi governasaun Taur Matan Ruak nian, ne’ebé prontu iha meza leten hodi entrega ba Primeiru-Ministru foun.
Notísia relevante : Xanana Gusmão hasoru Taur Matan Ruak iha Palásiu Prezidensiál
Biban ne’e, Taur reforsa katak prontu atu apoia Governu foun.
“Ami prontu para apoia,” Taur dehan.
Antes ne’e, Partidu tolu kompostu husi CNRT, PLP no KHUNTO asina plataforma polítika partidu polítiku bankada Parlamentár iha loron 12 outubru 2017 ho naran Aliansa Maioria Parlamentár (AMP).
Plataforma koligasaun ne’e akontese hafoin Eleisaun Parlamentár iha loron 22 jullu 2017 no membru deputadu foun lejislatura dahaat simu pose iha loron 05 setembru 2017.
Hafoin mosu diferensa ideia entre Partidu CNRT no PLP, maka Partidu neen kompostu hosi CNRT, KHUNTO, PD, UDT, FM no PUDD asina akta koligasaun iha loron 22 fevereiru 2020 iha sede CNRT, Bairro dos Grilos.
Iha sorin seluk, Prezidente-Repúblika, Francisco Guterres ‘Lú Olo’ simu karta demisaun hosi Primeiru-Ministru, Taur Matan Ruak iha loron 24 fevereiru 2020 no iha loron 08 abríl 2020, Xefe Governu retira nia karta demisaun tanba ho razaun surtu COVID-19.
Iha loron 07 marsu 2020, Partidu CNRT reafirma pozisaun liuhosi konferénsia estraordinária ida hodi hamutuk partidu lima forma koligasaun bazeia ba ejizénsia Prezidente-Repúblika, Francisco Guterres ‘Lú Olo’.
Iha loron 21 marsu 2020, Sekretariu Jerál FRETILIN, Marí Alkatiri no Prezidente PLP atuál PM VIII Governu Konstitusionál, Taur Matan Ruak, asina Plataforma entendimentu entre partidu rua hodi mantein Taur hanesan Xefe Governu hakotu mandatu iha 2023 no la konkorda Eleisaun Antesipada.
Jornalista : Antónia Gusmão
Editora : Julia Chatarina
