DILI, 05 jullu 2023 (TATOLI) – Governu Konstitusionál da-sia liuhusi Ministériu Juventude, Desportu, Arte no Kultura (MJDAK) sei dezenvolve arte no kreatividade oioin iha Timor-Leste (TL), durante mandatu.
“Ita iha programa adekuadu atu dezenvolve arte, la’ós de’it artezenatu, maibé arte oioin hanesan múzika, ema ne’ebé ukir, pintór sira no seluktan, maibé ita hein lai tanba ami sei prepara hela programa lubuk ida atu aprezenta ba Parlamentu Nasionál. Bainhira hetan ona aprovasaun ita sei implementa hodi dezenvolve,” Ministru Juventude Desportu no Arte Kultura (MJDAK), Nélio Isaac Sarmento hateten ba Agência Tatoli iha Palásiu Governu Dili, kuarta ne’e.
Tanba ne’e nia husu ba komunidade hotu ne’ebé envolve iha arte atu prepara aan ho kriatividade oioin ne’ebé iha atu dezenvolve liutan.
Notísia relevante:Grupu Teatru Uatucarbau sei promove produtu artezenatu ba jerasaun foun
Antes ne’e Sekretariu Estadu Arte no Kultura (SEAK) halo ona esbosu ba dekretu lei ba arte no kultura nian maibé daudaun ne’e sei iha faze sosializasaun.
Esbosu lei ne’e halo atu regula ka tau importánsia ba ema ida labele kopia ema seluk nia obra hanesan múzika, pintura no seluktan.
Notísia relevante:Komunidade Bucoli harii asosiasaun arte no kultura
Jornalista : Hortencio Sanchez
Editór : Rafael Ximenes de A. Belo
