VIQUEQUE, 20 outubru 2022 (TATOLI)— Grupu Teatru hosi postu Administrativu Uatucarbau, munisípiu Viqueque sei promove produtu artezenatu sasán kultura ba jerasaun foun sira.
“Ha’u-nia grupu hanesan kreativu Uatucarbau ne’ebé hala’i liu ba sasán kultura nian ne’ebé maka uluk ita-nia avó sira uza. Tanba agora ita haree sasán sira-ne’e komesa loron ba loron atu lakon ona. Ho ida-ne’e maka ha’u hakarak promove fali sasán kulturál nian, hodi fó hanoin fila fali ba jerasaun foun sira hodi ba futuru bele hatene katak uluk ita-nia avó sira uza sasán sira-ne’e”, Koordenadór Grupu Teatru, Tereza Jaquerão, hateten ba jornalista sira, iha postu Uatucarbau, kinta ne’e.
Tanba oin loron, Tereza dehan, tama ona ba mundu modernu ema hotu- hotu uza maka ricecooker, buli sok, tasu sok no seluk tan. Maioria la uza ona sasán sira ne’ebé uluk avó sira uza.
“Tan ne’e, maka ami ho inisiativa hakarak promove fila fali hodi hatudu ba mundu katak ita timor iha identidade no kultura. Hanesan biban sira avó sira uza ai maka prodús sai bikan no sana rai”, nia haktuir.
Nune’e nia dehan grupu Teatru hahú moris iha tinan 2017 ho objetivu atu promove no prodús sasán sira antigu nian hodi hatudu identidade Timor nian.
“La iha ema ida maka fó hanoin ba ami maka prodús produtu sira hanesan sana rai, homan sapeu sira-ne’e. Produtu sira-ne’e ami prodús faan iha loron boot ne’ebé maka realiza iha Uatucarbau”, nia hato’o.
Nune’e nia akresenta produtu ne’ebé hosi grupu Teatru prodús maka hanesan biti hosi tali, lou, sana rai, no bikan prodús uza ai.
Dezafiu ne’ebé grupu hasoru nia subliña konsege prodús produtu, maibé ema sosa maka laiha nune’e sai difikuldade ba grupu hodi reforsa produsaun grupu nian.
“Maske ami prodús barak, maibé ema sosa maka laiha. Ami so faan iha loron sira hanesan 20 maiu (Loron restaurasaun independensia), 30 agustu (Loron referendum), 28 novembru (Loron Proklamasaun Independensia) no loron boot sira seluk, maka ami foin faan hodi hetan netik osan,” nia dehan.
Nia relata, grupu Teatru governu liu hosi Sekretáriu Estadu Arte Kultura (SEAK) apoia orsamentu hamutuk $2,000. Grupu Teatru iha membru hamutuk na’in-20 envolve mós joven inklui balun ferik no katus.
Jornalista: Vitorino Lopes da Costa
Editóra : Armandina Moniz
