VIQUEQUE, 11 jullu 2023 (TATOLI)–Xefe suku Dilór, postu Lacluta, munisípiu Viqueque, Jacinto Ximenes, husu ba Governu atu hadi’a ponte Uma Tolu ne’ebé kotu tanba dezastre naturál foin lalais ne’e, nune’e bele fasilita movimentu ema no transporte.
“Ponte Uma Tolu kotu foin lalais tanba udan-boot ne’ebé akontese iha loron 03 to’o 04 jullu, nune’e difikulta abitante lokál nia movimentu, tanba ne’e ha’u husu ba parte Governu sentrál presiza hadi’a urjente atu abitante sira bela uza,” Xefe suku Dilór informa ba Agência Tatoli, iha postu Lacluta, tersa ne’e.
Nia dehan, daudaun ne’e bainhira abitante sira halo movimentu tenke transfere hosi karreta ida ba karreta seluk.
“Ami hato’o ona difikuldade sira ba Diresaun Obra Públika munisípiu Viqueque maibé seidauk iha resposta, depois ponte kotu ami hamutuk ho Administradór munisípiu Viqueque haruka kedas pedidu ba Institutu Jestaun Ekipamentu no Apoiu Dezenvolvimentu Infraestrutura Institutu Públiku (IGEADI, I.P) atu normaliza ponte Uma Tolu, maibé agora semana ida ona seidauk iha resposta ruma ba ami-nia preokupasaun,” nia akresenta.
Notísia relevante : Hahú ohin, públiku bele halo movimentu iha ponte Buanurak Viqueque
Aleinde ne’e, negosiante sira labele halo atividade, tanba ne’e presiza Governu sentrál nia tulun.
“Resposta atu normaliza seidauk, agora ami halo hela diskusaun ho abitante sira iha Lacluta hodi buka alternativa ida, hanesan atu tesi ai tau ba ponte Lacluta no karreta sira hosi Lacluta fó apoiu rai-henek hodi taka ponte kotu, sesta agora maka atu realiza,” Autoridade suku hato’o.
Iha fatin ketak, Diretór Servisu Obra Públika munisípiu Viqueque, Mário do Rego, hateten, kestaun ponte kotu hato’o ona ba parte nasionál maibé seidauk iha desizaun ruma.
“Ami rekolla ona dadus no haruka ona ba ministériu tanba desizaun sira ne’e ministériu maka bele deside,” nia tenik.
Ponte Uma Tolu lokaliza iha suku Uma Tolu, ne’ebé ponte ne’e liga ba suku haat hanesan Ahic, Dilor, Laline no Uma Tolu iha postu Lacluta, ho totál populasaun 5.853 (sensu populasaun 2010).
Jornalista : Vitorino Lopes da Costa
Editora : Julia Chatarina
