DILI, 13 jullu 2023 (TATOLI)—Prezidente Autoridade Munisípiu Dili (AMD), Guilhermina Filomena Saldanha, hateten daudaun AMD ne’e konstrui hela fatin hodi hatuur kontentór lixu iha Dili ne’e besik atu ramata ona.
“Ita-boot sira hatene katak ema hada hela kontentór fatin sira iha sidade Dili no besik ramata ona. Bainhira hotu tau ona, mak tau de’it kontentór ba leten. Kontentor ne’ebe mak tau ba leten ne’e depende algomerasaun ba ita-nia abitante sira. Se iha fatin ida abitante barak sei tau kontentór ida boot no abitante ladú barak mak sei koloka ida kiik,” nia dehan hafoin asina MoU ho UCCLA no AEMTL iha salaun AMD Matadouro, kuarta ne’e.
Ekipamentu ne’ebé kompañia sei fó ba AMD mak kamioneta lixu nian hamutuk 6000, kontentór 2.020, no fatin ne’ebé sei tau kamioneta ne’e hamutuk 1.122, depois iha mini dumper (karreta luxu mini) hamutuk 10.
Nia hateten, fatin ne’ebé kamioneta boot labele asesu, sei tau kamioneta kiik no ba kamioneta ne’ebé rekolla no kombate kedas ne’e hamutuk 16, iha kamioneta tolu tolu (3), kontentór ne’ebé fase sasán ne’e rua (2) ho eskavadór ida no ekipamentu pezada ida tan.
“Entaun ita bele dehan, iha ekipamentu pezada neen, ne’ebé kompañia hatama. Hosi ekipamentu hirak ne’e, gasta osan miliaun $7.6. Osan ne’e, Governu mak aloka no ami autoridade munisípiu Dili nian,” nia hateten.
Jornalista : Osória Marques
Editór : Cancio Ximenes
