DILI, 24 jullu 2023 (TATOLI)—Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P) sei hetan apoia mákina pezadu gratuitamente unidade 26 hosi Governu Japaun.
Prezidente interinu IGEADI, I.P, Abrão Pereira, haktuir, antes ne’e parte Ministériu Obra Públika (MOP) no Governu Japaun asina akordu.
“Daudaun ne’e Prezidente IGEADI, Hermenegilda da Costa, hamutuk ho ekipa iha ona Japaun atu halo konfirmasaun ba mákina sira, ne’ebé depende ba nia prosesu tanba haruka hosi nasaun ida ba nasaun seluk sei iha prosesu naruk, tanba ne’e ita hein de’it espera ita bele hetan iha tinan ne’e nia rohan lae sei hetan iha tinan oin,” Abrão Pereira, informa ba Agência Tatoli, iha ninia knaar fatin, Colmera, segunda ne’e.
Notísia relevante : Governu simu ona mákina pezadu hamutuk unidade 15
Apoia mákina sira hosi Japaun ne’e la’ós agora mak foin hetan maibé desde uluk kedas bainhira IGEADI, I.P hanesan diresaun hetan ona mákina pezadu lubuk ida hosi Governu Japaun.
“Apoiu ne’ebé daudaun ita atu hetan tan tanba Govenu Japaun liuhosi nia ajénsia Japan Demining and Reconstruction Assistance Center (JDRAC) ne’ebé desde inísiu ita halo kolaborasaun servisu fó kapasitasaun no tékniku nian ba ita-nia mekániku sira no akompaña mós ita-nia servisu hodi haree kondisaun sira ne’ebé sei menus hanesan mákina pezadu, entaun sira haree no hanoin hodi fó nafatin ajuda,” nia akresenta.
Iha sorin seluk, Embaixadór Timor-Leste iha Japaun, Elídio Ximenes, konfirma katak apoia mákina pezadu unidade 26 ba Timor-Leste ne’e loos.
“Maibé daudaun konkursu públiku la’o hela iha Japaun no nia rezultadu manan-na’in sei fó sai iha loron 26 agostu 2023. Bainhira rezultadu iha ona sai ha’u sei update ba imi,” nia hateten.
IGEADI, I.P daudaun uza hela mákina pezadu kategoria rua, sosa lokál no hosi doasaun.
“Kompra lokál iha unidade 56, agora ho kondisaun di’ak iha unidade 41, a’at iha unidade hitu no sei manutensaun iha unidade neen, hosi doasaun iha unidade 74, di’ak unidade 32, a’at unidade hitu, manutensaun hela unidade neen, ne’ebé totál mákina pezadu hamutuk unidade 130,” nia tenik.
Jornalista : Arminda Fonseca
Editora : Julia Chatarina
