VIQUEQUE, 27 jullu 2023 (TATOLI)—Ekipa hosi Programa Dezenvolvimentu Integradu Munisipál (PDIM) hahú halo avaliasaun ba projetu haat iha Viqueque ne’ebé daudaun empreza sira implementa.
“Ohin ami halo avaliasaun ba projetu PDIM haat ne’ebé daudaun ne’e la’o hela hodi rekolla progresu hosi empreza implementadór sira, nune’e ita bele hatene nia atinjimentu to’o fulan-novembru, to’o ona hira maka bele halo pagamentu ba empreza implementadór sira no porsentu hira maka bele reapropria ba tinan oin. Se projetu ne’e to’o tinan oin osan laiha, siginifika tama ba dívida” Diretór PDIM Viqueque, Domingos de Carvalho Monteiro, hateten hafoin atividade avaliasaun ba projetu, iha salaun administrasaun, kinta ne’e.
Notísia relevante : Konstrusaun armazén rai ai-moruk iha Viqueque atinje 20%
Nia dehan, bainhira tama ona ba dívida tenke lori tempu no hamosu orsamentu foun tanba tuir prosesu normál dívida sei lori to’o tinan 2025.
“Entaun, ita mós haree kapasidade emprezáriu iha munisípiu Viqueque ne’ebé ka’er projetu, ita tenke haree sira-nia forsa, tanba ne’e presiza iha atu nune’e ita bele hatene empreza implementadór sira-nia planu serbisu no konfirma karik tuir ona meta tanba durasaun implementasaun projetu fulan-neen, nune’e pelumenus tama novembru 2023 bele iha progresu di’ak hodi fó solusaun ba orsamentu,” nia akresenta.
Molok implementa PDIM, Servisu Obra Públika munisípiu verifika dezeñu no Bill of Quantity (BoQ), maibé seidauk iha unidade ida hodi kontrolu kualidade.
“Ekipa Unidade Traballu Espesífiku (UTE) ne’ebé iha administrasaun estatál maka fó apoia hodi haree ba projetu sira, enkuantu funsionáriu PDIM na’in-18 ne’ebé haree ba projetu maka halo monitorizasaun no orienta empreza sira,” nia akresenta.
Projetu haat ne’e implementa ho orsamentu hosi kapitál dezenvolvimentu $966.778.19, ho durasaun serbisu fulan-neen, hahu fulan-juñu to’o novembru 2023.
Orsamentu alokadu fahe ba projetu rebilitasaun rezidénsia administradór munisípiu Viqueque, morru no jardín iha suku Caraubalu, postu Viqueque Vila ho kustu obra $470.225,91, ne’ebé implementa hosi empreza Peaceful Unip.Lda no daudaun progresu serbisu atinje ona 3%, Uma armazén tau ai-moruk iha suku Caraubalu, postu Viqueque Vila ho kustu obra $144.286, ne’ebé implementa hosi empreza Bela Lari Unip.Lda no daudaun atinje ona 23%.
Nune’e mós, konstrusaun foun edifísiu administrasaun postu Ossu no morru haleu ho kustu obra $242.358,65, ne’ebé implementa hosi empreza Dira Nova Unip.Lda no progresu serbisu atinje ona 11% no seluk maka konstrusaun edifísiu foun Eskola Ensinu Báziku Filial (EBF) Cailaquebabo, postu Lacluta, ho kustu obra $109.908,19, ne’ebé implementa hosi empreza MOT-Qulim Unip.Lda, no daudaun seidauk implementa tanba kondisaun klima hosi loron 04 jullu no ponte kotu.
Atividade avaliasaun ne’e partisipa hosi enjiñeru PDIM, ekipa UTE inklui diretór empreza haat, enjiñeiru hosi empreza haat no Sekretáriu munisípiu Viqueque.
Jornalista : Vitorino Lopes da Costa
Editora : Julia Chatarina
