DILI, 02 agostu 2023 (TATOLI)–Membru Polísia Nasionál Timor-Leste (PNTL) na’in-ualu ne’ebé Komandu halo suspensaun preventiva ligadu ho kazu sidadaun ida mate iha sela Komandu Polísia Caicoli iha tinan kotuk, daudaun ne’e ativa hikas servisu fali ona.
Komandante Jerál PNTL, Komisáriu Jerál Henrique da Costa, argumenta, suspensaun ne’e iha ninia limitasaun.
“Suspensaun ne’e loron hira, fulan hira, ne’ebé kuandu membru ida ezekuta ona ninia suspensaun ne’e ramata tenke filafali ba servisu, signifika sira ativu fali ona,” Komisáriu Henrique da Costa hateten hafoin relata situasaun seguransa jerál ba Xefe Estadu, iha Palásiu Prezidensiál, Bairru Pité, kuarta ne’e.
Notísia relevante : Kazu mate iha sela polísia, MP delega kompeténsia ba PCIC loke prosesu investigasaun
Polísia Sientífiku Kriminál (PCIC, sigla potugés) daudaun ne’e kontinua halo investigasaun ba kazu sidadaun ida mate iha sela Caicoli.
“Ami lakohi inteven servisu parte seluk nian, ne’ebé daudaun ne’e sira kontinua halo investigasaun,” nia akresenta.
Antes ne’e, Komandu PNTL deside fó suspensaun preventiva ba membru Políisa na’in-ualu hosi Komandu munisípiu Dili, ne’ebé turnu iha kinta (01/09/2022) no iha momentu hanesan joven ida naran José Bernardo ‘Adriano’, mate ho kondisaun tali iha kakorok, iha sela detensaun Komandu PNTL Dili. Razaun halo suspensaun tanba membru hirak ne’e maka hala’o knaar iha ámbitu José Bernardo hakotu iis iha sela laran.
Liuhosi invetigasaun internál ne’ebé hala’o, Komandu Jerál PNTL foti medida kautelár hodi fó suspensaun preventiva durante loron-60 ba membru polísia na’in-ualu hosi munsípiu Dili, kompostu hosi ofisiál nain-tolu, sarjentu ida no ajente na’in-haat ne’ebé mak durante hala’o sira-nia knaar.
Membru PNTL na’in-ualu mak hanesan ofisiál ho inisiál A.S, M.S, A.Q, Serjentu ho inisiál S no ajente ho inisiál TW, F.A.D.A., A.A.M. no T.D.C.P.
Suspensaun preventiva ne’e ho baze ba investigasaun ne’ebé iha loron 02 setembru 2022, ne’ebé Komandu Jerál PNTL halo despaixu urjénsia ho númeru 365/CG-PNTL/IX/2022 hodi kria ekipa konjunta kompostu hosi ofisiál PNTL nain-haat, Prevedória Diretu Umanu no Justisa (PDHJ, sigla portugés), Ministériu Públiku (MP) inklui instituisaun relevante seluk hodi hala’o investigasaun internál liga ba kazu sidadaun ida mate iha sela detensaun.
Jornalista : Antónia Gusmão
Editora : Julia Chatarina
