DILI, 03 agostu 2023 (TATOLI)–Prezidente Konsellu Administrasaun Autoridade Portuária Timor-Leste, Institutu Públiku (APORTIL, I.P), Feliciano da Costa Correia, hateten, daudaun ne’e ró-ahi Berlin-Ramelau la halo operasaun tanba sertifikadu Naviu Pasajeiru (NP) expira ona, nune’e presiza halo manutensaun hodi hetan sertifikadu foun.
“Durante ne’e ró Berlin-Ramelau halo operasaun hosi Dili bá Oé-cusse, maibé agora paradu tanba sertifikadu NP expiradu, nune’e bazeia ba rekomendasaun hosi Diresaun Nasionál Transporte Marrítima (DNTM) iha fevereiru 2023, APORTIL, I.P neʼebé hanesan operadór presiza halo manutensaun ró-ahi Berlin-Ramelau hodi renova sertifikadu sira mak foin bele halo fali operasaun,” Feliciano da Costa, informa ba Agência Tatoli, via telefónika, kinta ne’e.
Daudaun ne’e prosesu aprovizionamentu la’o hela, ekipa juri sei avalia dokumentu bazeia ba repair list docking ka prosesu manutensaun ba renovasaun sertifikadu. Empreza manán-na’in sei haruka ró ba halo manutensaun iha Surabaya, Indonézia, iha tempu badak.
Notísia relevante : MTK kompromete ró-ahi Berlin-Ramelau sei la hasoru ona difikuldade
Governu liuhosi Ministériu Transporte no Komunikasaun (MTK) antes ne’e prevee orsamentu $800.000 ba manutensaun ró-ahi Berlin Nakroma no Berlin-Ramelau, ne’ebé manutensaun ne’e sei halo fazeadamente.
Antes ne’e, iha loron 31 maiu 2019, Governu reprezenta hosi Ministériu Transporte no Komunikasaun asina akordu ho Governu Federál Alemaña no empreza estaleiru navál Damen hodi halo konstrusaun ba ró-ahi Berlim-Ramelau. Projetu ne’e rasik, Governu Alemaña kontribui millaun €7,8 no Timor-Leste millaun €7,1.
Nune’e, iha loron 20 dezembru 2021, Governu Alemaña ofisialmente entrega ró-ahi ne’e ba Governu Timor-Leste.
Jornalista : Arminda Fonseca
Editora : Julia Chatarina
