BOBONARO, 08 agostu 2023 (TATOLI) – Abitante aldeia tolu hanesan Mazop, Odelgomo no Laho, iha suku Ai-Asa, postu administrativu Bobonaro, munisípiu Bobonaro durante tinan 20-resin ona halerik enérjía eletrisidade no fasilidade saúde.
Veteranu aldeia Mazop, Pedro de Araújo, preokupa tanba atu asesu ba fasilidade saúde ne’ebé governu estabelese iha postu Bobonaro Vila tenke lao-ain ho distánsia kilómetru ualu.
Notísia relevante: Fatin konsentrasaun FALINTIL iha Odelgomo sei iha nakukun
“Ami iha aldeia Mazop nia preokupasaun mak ahi mós seidauk tama, depois feto isin-rua atu partu ne’e derrepenti de’it, entaun ami leba de’it mak lori sa’e ba Bobonaro, nia la’o ladi’ak, karreta mós la mai, tanba tempu udan ne’e estrada ladi’ak, mota mós boot no ponte laiha,” nia ko’alia iha sede aldeia Odelgomo, tersa ne’e.
Eis xefe aldeia Mazop ne’e haktuir, antes ne’e Governu observa dala tolu ona fatin atu konstrui fasilidade saúde iha aldeia Mazop hodi atende komunidade uma-kain 60-resin.
“Ha’u sei xefe aldeia ne’e haree dala-rua, agora xefe aldeia Luis nia ne’e dala-ida, até agora sentru saúde seidauk halo, ami sente triste, tanba ami la’o dook, kuandu ema moras ruma la’o de’it ba Bobonaro,” nia hateten.
Xefe aldeia Laho, Afonso de Jesus Amarál, rekomenda ba Ministeriu Saúde atu haree kestaun refere hodi estabelese postu saúde iha fatin ne’e atu nune’e bele hakbesik atendimentu saúde ba komunidade sira.
“Aldeia tolu ne’e akontese hotu ona liuliu aldeia Laho dala-rua ka tolu ona, leba inan isin-rua ba to’o iha postu saúde Bobonaro, tempu bailoro ita sente di’ak oituan, maibé tempu udan dezaraska liu tanba hakuur mota hira mak ba to’o Bobonaro,” nia konfirma.
“Ami iha aldeia tolu ne’e la sente dezenvolvimentu, para de’it iha suku, tanba ami-nia suku Ai-Asa ne’e iha aldeia neen, aldeia tolu asesu ona, maibé aldeia tolu hanesan Mazop, Odelgomo no Laho seidauk ida, ha’u hakarak husu de’it, tanba saida mak seidauk, povu sira iha ne’e momentu ne’ebá fó ona kontribuisaun ba rai ida-ne’e ohin loron atu to’o 20 agostu mós, ukun-na’in sira nunka hanoin kona,” nia dehan.
Lider aldeia ne’e sente triste haree kondisaun refere, tanba atu hetan naroman iha tempu kalan komunidade sira tenke sosa rasik solar painél, maibé ba hirak-ne’ebé iha kapasidade ekonomia natoon
“Sira-ne’ebé kapasidade finanseira laiha ne’e uza de’it mina-rai no lampu tradisionál dezde bei-ala sira hanesan sunu kamí, sira fai hotu tiha depois kumu hamutuk ho kabaas, depois mak kumu hamutuk iha kesak mak foin sunu. Ida-ne’e estudante oan sira mós susar atu estuda iha kalan,” nia akresenta.
Tuir dadus aldeia Laho, suku Ai-Asa, postu administrativu Bobonaro, munisípiu Bobonaro iha abitante na’in-543 ho uma-kain 69.
Notísia relevante: Konstrusaun sala haat EBF Odelgomo atraza
Jornalista: Sérgio da Cruz
Editór: Evaristo Soares Martins
