BOBONARO, 08 agostu 2023 (TATOLI) – Konstrusaun sala haat iha Ensinu Báziku Filiál (EBF), Odelgomo, suku Ai-Asa, postu administrativu Bobonaro, munisípiu Bobonaro atrazadu, tanba kondisaun estrada.
Koordenadór EBF Odelgomo sesante, João Ribeiro, esplika, projetu komunitária refere la’o atraza dezde fulan-abríl tinan 2022.
“Ha’u hanoin ne’e la’ós dezafiu ba ema servisu, maibé estrada komesa kedas iha 25 ho 26 outubru 2022 kareta la tama ona, materiál iha hela, como la fó fatin de’it,” nia informa ba Tatoli, iha Bobonaro, tersa ne’e.
Nia dehan, daudaun ne’e badaen sira hahú ona halo servisu tanba Ministériu Obra Públika hadi’ak ona dalan hahú hosi Bobonaro Vila to’o Odelgomo. Enkuantu tuir dadus hosi enjiñeiru lokál obra ne’e atinje ona 26%.
“Ami foin foti osan segundu faze ninian mak ami ba hola kalen ho baja ninian, agora badaen sira mak seidauk mai servisu de’it,” nia katak.
Kona-bá mobiliáriu hanesan meza no kadeira manorin-na’in ne’e dehan, sei sufisiente hela tanba Ministériu Edukasaun distribui ona unidade 180-resin.
Totál estudante iha EBF ne’e hamutuk na’in-109 ho totál profesór na’in-hitu komposta hosi kontratu ida no restante permanente.
Jornalista : Sérgio da Cruz
Editór : Evaristo Soares Martins
