DILI, 21 agostu 2023 (TATOLI) – Ministériu Edukasaun (ME) halo, foin lalais ne’e, inspesaun urjente ba Ensinu Báziku Sentrál (EBC, sigla portugés) Faról, Dili kona-ba implementasaun Programa Merenda Eskolár. Inspesaun ne’e hodi konfirma ho dirijente eskola nian atu klarifika preokupasaun alunu sira sobre merenda ne’ebé estudante sira hetan uitoan liu.
Iha observasaun ne’ebé ekipa ME halo iha eskola refere hatudu katak merenda eskolár ba alunu sira laiha problema no menú sira tuir duni orientasaun husi Ministériu Saúde.
Diretór Nasionál Asaun Sosiál Eskolár no Asuntu Sanitária husi ME, Joaquim Martins, hatete informasaun ne’ebé mak alunu sira pasa ba média ne’e laloos. “Estudante sira han di’ak no bazeia ba menú ne’ebé maka aprova ona husi Ministériu Saúde kona-ba ai-han haforsa, haburas no fó protesaun. Menú sira ne’e maka durante ne’e implementa ba nivel territóriu, liuliu ba merenda eskolár”, dehan Joaquim Martins ba Tatoli iha Vila Verde.
Nia dehan informasaun ne’ebé maka fó sai husi estudante sira ne’e la bazeia ba realidade, tanba observasaun ne’ebé maka ekipa husi ministériu halo iha 14 agostu ne’e buat hotu la’o di’ak.
“Ha’u hakarak dehan observasaun ami halo ne’e la haree hetan hahán estraga. Dalaruma estudante sira lori osan han ona iha li’ur, entaun bainhira to’o tempu merenda sira barak bosu ona. Sira lahan hotu hahán sira no estraga de’it depois sira dehan ita-nian koziñeira sira te’in ladi’ak”, katak.
Tanba ne’e, presiza kria jestaun ida di’ak bainhira implementasaun merenda eskolár ne’e, eskola bele halo observasaun atu estudante sira bele asesu hotu, nune’e haree saida maka akontese hodi bele foti konkluzaun ida atu labele hamosu tan problema.
Rekorde katak iha entrevista ho Tatoli foin lalais ne’e, alunu sira husi EBC Farol preokupa ho merenda eskolár ne’ebé sira hetan tanba uitoan liu.
“Hahán di’ak ona, maibe ha’u ladún gosta han na’an karau tanba na’an uat halo nehan moras. Depois Ami mós halo protesta tan sira tau etu uitoan loos. Dalaruma modo mós sira tau ladún barak no modo-been mós labarak. Ne’e mak halo ami ladún gosta”, Meliani da Cunha, aluna EBC Farol hatete foin lalais ne’e.
Hanoin hanesan mós hato’o husi Jebedeu da Costa, estudante husi eskola hanesan, katak sira tau etu natoon de’it. Modo ne’ebé sira han maka na’an-karau (bife), koto, manu-tolun, fore-mungu no susu-been. “Hahán di’ak maibé ami husu aumenta tan etu”.
Iha sorin seluk, Clarita Lay konta mós katak hahán labarak no “bife musan haat la’e lima de’it ho manu-tolun ida. Hakarak aumenta etu kanuru ida ho balu mós di’ak, maibe ida ne’e sira tau dalaruma la to’o tan kanuru ida”, nia relata.
“Ami han la bosu, ami bá sosa fali etu sentavu 0,50 ne’ebé ema fa’an iha eskola hodi han. Ami hakarak ne’e iha variedade hahán, loroloron han hela de’it hanesan halo ami baruk fali”, nia salienta.
Iha sorin seluk, Diretora EBC Faról, Filomena Freitas, mós hatete merenda eskolár iha eskola Faról laiha problema tanba informasaun sira ne’ebé maka estudante sira hato’o ba média sira maka la tuir realidade.
“Ami-nian eskola hetan inspesaun urjente husi Ministériu Edukasaun iha loron 14 agostu relasiona ho informasaun ne’ebé maka estudante sira fó sai iha média balun. Informasaun sira ne’e, sira hato’o tuir de’it sira-nian hakarak, maibé depois iha observasaun ne’e buat hotu la’o di’ak. Ekipa halo fali observasaun kuaze estudante sira dehan buat hotu di’ak, hahán sira tasak no laiha problema”, realsa.
EBC Faról akumula estudante hamutuk 2.157 no presiza iha koordenasaun ida di’ak bainhira implementa merenda eskolár ne’e.
Iha programa IX Governu nian atu implementa refeisaun manas ba alunu sira ne’e no ne’e tenke bazeia duni ba ai-han nutritivu no variedade, nune’e alunu sira bele konsumu ho di’ak hodi bele ajuda sira partisipa iha sala aula ho di’ak liután.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loroloron ho hahán saudável, ekilibrada no indispensavel ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen.
Notísia relevante: Alunu sira iha EBC Farol preokupa ho merenda eskolár
Jornalista: Tomé Amado
Editora: Maria Auxiliadora
