DILI, 23 agostu 2023 (TATOLI)—Uniaun Sidade Kapitál Lian Portugeza (UCCLA, sigla portugés) halo parseria ho Autoridade Munisipiu Dili (AMD) no Asosiasaun Negósiu Feto Timor-Leste (AEMTL), asina Memorandu Entendimentu (MoU) ida atu promove emprezaria feto iha munisípiu Dili.
Akordu ida-ne’e hanesan parte ida hosi parseria ba haforsa Governasaun Urbanu, Inkluzaun Sosiál no Promosaun Emprezaria Feto iha Dili, ne’ebé finansia hosi Uniaun Europeia nomós envolve hosi Konsellu Sidade Lisboa.
“Objetivu hosi MoU ne’e atu promove konkursu joven ba emprezaria ho títulu “Ideias Dili Inovar,” ne’ebé sei lansa iha loron 07 fulan-setembru tinan ida-ne’e. Inisiativa “Inovasaun Ideia Dili nian ” ho objetivu atu enkoraja joven feto sira atu esplora oportunidade negósiu nian no kontribui ba kriasaun empreza foun no empregu sira, hodi ajuda hasa’e kresimentu ekonómiku iha sidade Dili,” Prezidente Autoridade Munisípiu Dili (AMD), Guilhermina Filomena, hatete ba jornalista sira, hafoin asina akordu MoU, iha salaun AMD Matadouro, kuarta ne’e.
Pre-selesionadu kandidatu sira hosi konkursu “Ideas-Dili Inovar” ne’e sei simu formasaun no mentorizasaun hosi Institutu Apoiu ba Dezenvolvimentu Emprezariu (IADE) no AEMTL hodi ajuda dezenvolve sira-nia abilidade negósiu no hadi’a sira-nia ideia negósiu, iha rede ho emprezáriu feto lokál sira seluk.
“Liuhosi asina akordu ho Asosiasaun Emprezariál Feto Timor-Leste ne’e hodi ajuda feto hodi hamrik mesak ba negósiu rasik no oinsá mak sira bele dezenvolve mesak negósiu, nune’e hosi ne’e mak bele hamenus violénsia doméstika,” nia dehan.
Nia dehan, ho abitante 200.000-resin hela iha sidade Dili entaun tempu ona AEMTL ho AMD akumula no empodera feto maluk sira liuhosi empreendedorizmu, nune’e aumenta sira-nia ekonómia hodi sustenta ba família uma laran.
Aleinde ne’e, nia dehan ohin mós lansa konkursu ideia inovativu ba joven sira no inisíu setembru hein no husu ba joven sira bele mai partisipa.
Orsamentu ba programa sira-ne’e hetan apoiu hosi Uniaun Europeia (UE) hamutuk millaun $3 resin, no projetu ne’e hahú ona iha tinan kotuk no sei ramata iha fulan-maiu 2025.
Prezidente Asosiasaun Emprezariál Feto Timor-Leste (AEMTL), Hergui Luina Alves, dehan akordu ida-ne’e, parseria entre AEMTL ho Autoridade Munisípiu Dili ho UCCLA hodi promove feto iha área negósiu nian.
“Parseria ne’e atu estabelese programa rua. Ida, mak atu halo kompetisaun ho naran Dili Inovar. Kompetisaun ne’e loke ba joven hosi tinan 17-25, atu partisipa iha ideia negósiu di’ak hodi kompete no aumezmu tempu manan na’in-20 sei tuir formasaun iha AEMTL no mós IADE,” Luina dehan.
Liuhosi formasaun ne’e hodi fó kapasitasaun ba área empreendedorizmu, nune’e sira bele organiza sira-nia negósiu.
Hosi manan-na’in ne’e, sei iha konkursu ikus no depois manán-na’in neen mak hetan prémiu, ne’ebé mak sei hetan mós kapitál inisiál hodi hala’o negósiu no sira seluk sei akompaña nafatin atu nune’e sira konklui sira-nia negósiu no aplika ba fundu kapitál hosi Banku.
Nia hatutan, programa seluk mak haree ba fortalesimentu institusionál atu ajuda AEMTL hodi hadi’ak liután merkadu, advokásia no hadi’a mós instituisaun no halo mós ho organizasaun sira iha Portugál no programa balun ne’ebé halo mós iha Dili, nune’e bele fó benefísiu mós ba AEMTL no fó apurtunidade ba feto emprezariál sira iha Timor-Leste.
“Programa ne’e loke ba joven ne’ebé ho ideia negósiu foun iha empreendedorizmu nune’e ita hanorin para sai emprendedór. Entaun, ida-ne’e ba ema foun ne’ebé komesa hola fatin iha vida empreendedorizmu,” nia hateten.
Nia dehan, feto empreendedorizmu ne’e feto barak mak partisipa no hala’o sira-nia negósiu no daudaun ne’e seidauk iha númeru sertu tanba sei iha prosesu rekolla dadus.
Enkaregadu Uniaun Europeia iha Timor-Leste, Dorthe Wacker, hateten ko’alia liu kona-ba papél importante ne’ebé empreza ki’ik no médiu sira hala’o iha sira-nia negósiu hodi ba ekonómia ida-ne’ebé funsiona di’ak, fornese empregu no meiu moris ba ema no hasa’e kreximentu ekonómiku.
Jornalista : Osória Marques
Editór : Cancio Ximenes
