DILI, 28 agostu 2023 (TATOLI)–Ministru Administrasaun Estatál (MAE), Tomás Cabral, Embaixadór Indonézia, Okto Dorinus Manik, segunda ne’e, diskute kona-ba setór públiku hodi reforsa atendimentu iha baze.
“Ohin, ami rua ko’alia liuliu kona-ba reforma nian tanba sira iha Jakarta-Indonézia halo reforma burokrásia Estadu nian. Depois ko’alia mós kona-ba orsamentu ne’ebé tau barak-liu iha suku tanba suku mak ekonómia la’o barak liu. Nune’e, nia sei apoiu diretór sira balun hodi haree ba reforma iha setór públiku hodi reforsa atendimentu iha nível baze sira,” Tomás Cabral hateten ba jornalista sira, hafoin hasoru malu ho embaixadór Indonézia iha edifísiu MAE, Caicoli.
Aleinde ne’e, governante ne’e hateten sira na’in rua mós ko’alia kona-ba ekonómia iha Ataúro, tanba Ataúro mak nia kondisaun di’ak ida, ró-ahi bele ba-mai oras ida-ida bele sustente mós illa Indonézia sira-ne’ebé besik Ataúro, hodi lori sira-nia produtu mai Ataúro no bele dehan Ataúro sai sentru ekonómia ida entre illa ne’ebá.
Embaixadór Indonézia, Okto Dorinus Manik, hateten servisu bilaterál Timor-Leste ho Indonézia nian iha dezenvolvimentu baze sira.
“Ami-nia hasoru malu ida-ne’e hodi reforsa nafatin ami-nia servisu bilaterál iha área oioin. Maibé, ba oin ami sei identifika no ami sei halo mudansa iha suku maibé ida-ne’e hanesan planu. Ba oin, ami sei haree ninia problema sira tanba ami-nia atendimentu ba dezenvolvimentu Timor-Leste nian,” nia hateten.
Governu planea separa ba RAEOA-ZEEMS
Entretantu, Ministru Administrasaun Estatál (MAE), Tomás Cabral, hateten IX Governu Konstitusionál iha ona planu halo separasaun Rejiaun Administrativa Espesiál Oé-Cusse Ambeno (RAEOA) ho Zona Espesiál Ekonómia Sosiál Merkadu (ZEEMS) nune’e bele organizadu.
“RAEOA ho ZEEMS la hanesan, ida ba trata Administrasaun zona ekonómia ko’alia kona-ba merkadu. Entaun, buat rua ne’e la kahor. Administrasaun trata ema no merkadu trata ema-nia kabun,” Tomás Cabral hateten.
Jornalista : Osória Marques
Ediór : Cancio Ximenes
