DILI, 01 setembru 2023 (TATOLI) – Profesór 338 husi Eskola Sekundária Tékniku Vokasionál (ESTV) sei partisipa formasaun espesífika iha área eletrisidade, mekánika, eletróniku, konstrusaun sivíl, agrikultura no otelária nune’e bele hetan sertifikadu nivel 4 nian.
Lista dosente sira ne’e submete ona ba Institutu Nasionál Dezenvolvimentu Mão de Obra (INDMO) tanba instituisaun ne’e mak sei responsabiliza formasaun refere no sei realiza durante fulan neen nia laran. INDMO maka mak sei deside ema na’in hira maka sei partisipa uluk formasaun.
“Dadus ne’ebé submete ona ne’e presiza mós perfíl profesór sira-nian, nune’e bele halo identifikasaun na’in hira maka hetan ona sertifikadu nivel 4 no hira mak seidauk hetan. Ne’e obrigasaun profesór tékniku vokasionál sira aprezenta perfíl ida-idak molok tuir formasaun”, Diretór Nasionál Tékniku Vokasionál, Agostu Pereira, hatete ba Tatoli.
Bainhira iha prosesu identifikasaun dadus mak manorin balun iha ona sertifikadu nivel 4 maka Ministériu Edukasaun sei rekomenda ba INDMO atu disponibiliza formasaun avansada, nune’e bele hasa’e sira-nian abilidade iha futuru.
Diretora INDMO, Isabel Fernandes de Lima, admite katak INDMO simu ona lista naran profesór sira no sei halo verifikasaun. Tuirmai sei deside tipu formasaun iha área ne’ebé mak sei realiza uluk.
“Ba formasaun ne’e rasik sei INDMO mak responsabiliza hodi haree sentru ne’ebé maka bele akomoda profesór sira hodi hetan formasaun espesífika. Sei ko’alia ho ADB hodi bele kapasita manorin sira. Matéria hotu INDMO maka sei responsabiliza”, dehan.
Iha sorin seluk, profesór Jerónimo da Silva Freitas satisfeitu ho Ministériu Edukasaun nia programa tanba hanoin di’ak hodi loke oportunidade ba dosenre sira partisipa formasaun iha área espesífika sira.
“Ne’e importante duni hodi bele akompaña mudansa teknolojia. Tanba ne’e, presiza hasa’e kapasidade profesór sira hodi lori dezenvolvimentu ba nasaun”, realsa.
Jornalista: Tomé Amado
Editora: Maria Auxiliadora
