OÉ-CUSSE, 13 setembru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Terra Propriedade, kuarta ne’e halo lansamentu kona-bá pagamentu plantasaun ba uma-kain 136 ne’ebé afeta iha prosesu alargamentu estrada iha projetu ZEESM.
Pagamentu afetadu ba plantasaun ne’e, bazea ba Deliberasaun Autoridade númeru 2/2017, loron 30 fulan marsu, valór pagamentu fahe ba tipu tolu, hanesan produtiva, ki’ik no natoon, ho presu hahú hosi dolar $5 to’o dolar $60.
Notísia relevante: RAEOA prepara ona deliberasaun paga rai afetadu ZEESM
Serimónia lansamentu ne’e dirije hosi Adjuntu Prezidente Autoridade RAEOA ba Asuntu Sosiál, Maximiano Neno, reprezenta Prezidente Autoridade, iha suku Taiboko, sub-rejiaun Pante Makasar.
Nia husu ba benfisiáriu sira uza fundu pagamentu ne’e, ba nesesidade públiku, hodi kontribui ba prosesu dezenvolvimentu.
“Osan ne’ebé ohin imi simu, uza didi’ak ba tuir nesesidade nian, labele estraga ba lia, maibé sei bele kuda fali ai-oan ne’ebé hetan estragu, nune’e iha futuru bele hafurak ita-nia rai, bele mós hola netik karau ida atu haki’ak, iha futuru bele sai istória ida, tanba osan ne’e la’ós selu, maibé valoriza, tanba durante iha ezekusaun projetu imi kontribui ona iha prosesu dezenvolvimentu,” nia fó hanoin ba komunidade sira iha ámbitu lansamentu ne’e.
Sekretáriu Rejionál ba Asuntu Terra Propriedade, António Hermenegildo da Costa, hateten, lansamentu ne’e ba pagmentu plantasaun nian ne’ebé maka afeta ba iha konstrusaun estrada hotu-hotu iha projetu ZEESM.
Hosi uma-kain 136 ne’e mai hosi suku lima, ho benefisiáriu hamutuk 136, hosi suku Costa uma-kain 12, suku Lifau na’in-23, Taiboko na’in-88, Suni-Ufe na’in-lima inklui suku Ban-Afi sub-rejiaun Nítibe na’in-neen.
Nune’e, parte terra propriedade agradese ba komunidade afetadu sira, tanba durante ne’e ho konsiénsia hodi oferese rai no ai-oan hodi kontribui ona iha prosesu dezenvolvimentu sira bele la’o ho susesu.
“Ohin hanesan promesa ida hosi Autoridade RAEOA, ohin tenke realiza nia promesa ne’ebé antes ne’e hato’o ona ba komunidade sira, nune’e ba sira-ne’ebé ohin simu, ida-ne’e mak ita-nia direitu,”nia orgullu.
Tuir nia, pagamentu ida-ne’e la’os selu hanesan pagamentu idozu, hotu-hotu hanesan, maibé diferente, sé mak afeta barakliu, entaun sei simu direitu ne’e barak, sé mak afeta uitoan sei direitu ne’e mós la liu hosi valór sira-ne’e rejista ona.
Nia informa, iha inisiu setembru ne’e, Sekretáriu Rejionál Terra Propriedade halo ona lansamentu ba uma afetadu, uma troka uma, ohin halo pagamentu ba plantasaun troka ho osan, no faze tuir sei tama pagamentu asuntu rai ninian.
Benefisiáriu Melquiano Taiboko, hosi suku Taiboko, reprezenta benefisiáriu sira agradese ba Autoridade RAEOA, tanba konsege realiza duni promesa hodi konsidera komunidade sira-nia patrimóniu ne’ebé hetan afeta iha alargamentu estrada.
“Dalaruma ami mós lakohi simu, bainhira alargamentu mai kona ami-nia ai-horis, maibé ita tenke simu tanba ne’e dezenvolvimentu ba ita-nia rai, liuliu ba Oé-Cusse, kona-bá folin ba plantasaun sira, ami ladún preokupa, maibé ami senti satisfaz tanba Governo bele valoriza,” nia orgullu.
Notísia relevanteAutoridade RAEOA harii uma 36 troka uma tali
Jornalista : Abílio Elo Nini
Editór : Evaristo Soares Martins
