COVALIMA, 13 setembru 2023 (TATOLI)–Autoridade Covalima liuhosi Diretór Interinu Agensia Fiskalizasaun Miguel Armada Cardoso husu Komisaun E parlamentu Nasionál atu hala’o fiskalizasaun ba implementasaun Programa Nasionál Dezenvolvimentu Suku (PNDS) no Programa Mão de Obra Postu Administrativu (PMOPA) iha munisípiu Covalima.
“Ha’u rekomenda ba deputadu sira atu halo fiskalizasaun implementasaun programa ne’ebé implementa hosi Programa Nasionál Dezemvolvimentu Suku (PNDS) hanesan halo kuotasaun fornese materiál konstrusaun Uma Naroman ba Povu (UNP) foku ba materiál fabrikanu no la’ós fabrikanu presiza atu haree didiak ho sériu,” Diretór Interinu Ajénsia Fiskalizasaun, Miguel Armada Cardoso, hateten ba deputadu PN Komisaun E iha salaun AMC, kuarta ne’e.
Implementasaun programa PNDS presiza atu haree didi’ak, tanba bazeia ba fiskalizasaun konstrusaun Uma Kbiit Laek (UKL) ka Uma Naroman ba Povu (UNP) barak laiha kualidade no mós programa PNDS konstrui moru iha EBC Salele laiha kualidade no kle’uk ba-mai.
Aldeinde fiskaliza programa PNDS, nia dehan, presiza mós fiskaliza implementasaun programa PMOPA ne’ebé implementa hosi administradór postu administrativu sira-ne’ebé nakonu ho manipulasaun.
Tuir Matadalan, grupu ida traballdór na’in-20 maibé realidade iha implementasaun grupu balun la to’o ema na’in-20 maibé traballdór na’in-10 de’it no mós uza karreta relata iha relatóriu karreta 10 maibé realidade iha nia implementasaun karreta haat de’it.
Ho problema hirak ne’ebé Ajénsia Fiskalizasuan Munisípiu Covalima identifika durante implementasaun programa Mão de Obra Postu Administrativu nune’e presiza atu halo fiskalizasaun kle’an ba administradór postu administrativu sira.
Membru komisaun E parlamentu Nasionál hosi Bankada FRETILIN, Deputadu Dário Madeira hato’o agradesimentu ba administradór postu administrativu sira pronto bainhira ekipa sira atu halo invetigasaun nune’e labele halai hosi responsabilidade.
“Ha’u agradese ba administradór postu administrativu sira prontu atu simu investigasaun ruma mai ida-ne’e mak bolu lideransa ne’ebé lidera komunidade durante ita-nia mandatu, nune’e tenke prontu duni, balun loos no la loos ita tenke asume responsabilidade,” nia dehan.
Sekretáriu Administradór Munisípiu Covalima, Francisco de Jesus Alves, hateten bazeia ba implementasaun programa Mão de obra Postu Administrativu hamosu erru barak ne’ebé durante implementa iha munisípiu Covalima.
“Diretór Ajénsia fiskalizasaun hato’o katak durante implementasaun programa Mão de Obra Postu Administrativu (PMOPA) identifika erru lubuk ida, maibé atu hakarak hato’o ba ita-boot sira, servisu fiskalizasaun apoiu administradór atu haree ba programa no projetu la’o iha munisípiu,” nia hateten.
Hafoin Agensia fiskalizasaun hala’o sei relata relatóriu ba Administradór Munisípiu Covalima hodi uza nia kompeténsia atu fó xamada ba implementadór PMOPA depende ba realidade no faktu.
Implementasaun PMOPA iha Covalima prióridade ba programa sira hanesan postu administrativu balun fó prioridade ba halo reflorestasaun, limepza, hadi’a estrada tanba servisu ne’ebé mak uza ema-nia forsa la uza mákina pezadu sira depende ida-idak nia planu.
Implementasaun PMOPA kada postu administrativu aloka orsamentu rihun $100 ho nia ezekusaun ba faze dahuluk ezekuta 50% no ba faze daruak nia ezekusaun 50%.
Jornalista : Celestina Teles
Editór : Cancio Ximenes
