VIQUEQUE, 18 setembru 2023 (TATOLI)—Organisaun Naun Govermentál, Fundasaun K’nua Haburas Komunidade (KHK) no Catholic Relief Services (CRS) apoia mákina prosesamentu mina-nuu ba grupu produsaun ualu, iha suku Uma-Uain Leten, postu administrativu Viqueque Vila, munisípiu Viqueque.
“Distribuisaun ekipamentu ho objetivu fó kbiit ba grupu sira atubele prodús mina-nuu hodi bele fa’an ba konsumidór sira,” Diretór Fundasaun KHK, Agusto Pinto, informa iha aldeia Baria, suku Uma-Uain Leten, segunda ne’e.
Grupu ualu kompostu hosi Moris Foun, Lekarai Inda, Buka Took, Hases Kiak, Koko Moris, Segerou, Ualabia no Ana Morin.
Mákina iha tipu rua hanesan dulas nuu unidade ualu no pres nuu unidade ualu, nune’e kada grupu hetan mákina tipu rua ne’e inklui balde no tasu.
“Ba oin ami kontinua akompaña grupu sira hodi bele halo produsaun no haree mós ba jestaun no rendimentu grupu, inklui akompaña fa’an mina-nuu iha merkadu sira,” nia akresenta.
Notísia relevante : MAP Viqueque halo espansaun área ektare 10 hodi kuda nuu-oan
Nune’e, Diretór Fundasaun husu ba grupu produsaun sira hodi mantein komunikasaun di’ak ho membru no tenke iha transparánsia hodi labele hamosu dezentendimentu iha grupu laran.
“Tanba liga ho osan, entaun ita presiza iha komunikasaun no transparánsia hodi labele deskonfia malu no grupu bele kontinua ba oin,” nia fó hanoin.
Iha fatin hanesan, Administradór postu Viqueque Vila, Duarte Brandão Soares, husu ba grupu produsaun sira atu uza ekipamentu ho responsável hodi bele hetan rendimentu sustenta moris família uma-laran.
“Daudaun ne’e grupu sira simu ona ekipamentu, nune’e ha’u husu tenke uza ho di’ak atubele hetan osan ruma. Ho ekipamentu sira ne’e grupu sira prodús mina-nuu hodi fa’an, ita labele moris ba kotuk beibeik maibé tenke la’o ba oin,” nia enkoraja.
Nune’e mós, Xefe suku Uma-Uain Leten, Martinho Soares, agradese tanba grupu ualu ne’ebé eziste iha suku laran bele halo produsaun.
“Grupu sira-ne’e eziste iha ne’e no ba oin sira bele halo produsaun mina-nuu, maski nuu ne’ebé beila sira kuda ho kuantidade ki’ik ona. Ha’u husu ba Governu atubele apoia viveiru nuu ruma ba ami hodi ami bele kuda, nune’e bainhira grupu sira halo produsaun mina-nuu karik bele garante stock nuu,” nia hato’o.
Iha okaziaun ne’e, Koordenadora grupu Moris Foun, Paulina Henrique, hosi aldeia Baria, suku Uma-Uain Leten, apresia ba inisiativa KHK no parseiru ne’ebé apoia ona ekipamentu ba grupu.
“Ami agradese ba KHK ne’ebé apoia ona ekipamentu hodi motiva ami halo produsaun. Nune’e ami sei esforsu prodús mina-nuu no KHK ho CRS sei apoia ami hodi buka merkadu ba ami,” nia dehan.
Jornalista : Vitorino Lopes da Costa
Editora : Julia Chatarina
