OÉ-CUSSE, 20 setembru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, kaurta ne’e ne’e inaugura projetu ponte Bitopa hodi fasilita komunidade sira mai hosi suku sia (9) iha sub-rejiaun Oésilo, Pássabe no Nítibe atubele transporta produtu lokál hodi asesu ba merkadu sira iha sub-rejiaun Pante Makasar.
Nótisia relevante: Molok udan monu rai, komunidade bele asesu ona ponte Bitopa ho Noetoko
Ponte Bitopa lokaliza iha aldeia Buqui, suku Usitasa’e, sub-rejiaun Oésilo, no ponte ne’e rasik nia medida naruk metru 64 kompleta ho protesaun moru gabiaun metru 170.
Ponte ne’e rasik sei fasilita komunidade mai hosi sia (9 komposta hosi suku Usitasa’e, Bobometo no Usitaqueno pertense ba sub-rejiaun Oésilo, suku Abani no Malelat sub-rejiaun Pássabe no suku haat seluk pertense sub-rejiaun Nítibe hanesan; Ban-Afi, Lela-Ufe, Usitaku no Bene-Ufe.
Nótisia relevante: Joven sira Usitasa’e RAEOA inisiativa ajuda ema no transporte públiku ultrapasa mota Bitopa
Prezidente Autoridade RAEOA, Arsénio Paixão Bano, orgullu tanba ponte Bitopa importante, atu fasilita komunidade sira iha sub-rejiaun Oésilo, Pássabe no Nítibe atu asesu ba zona sentrál Pante Makasar iha tempu udan.
“Ha’u fiar katak ponte ne’e sei di’ak, hetan apoia hosi bei-ala no rain na’in-sira, tanba ponte ne’e sei liga Oé-Cusse, zona sentrál Pante Makasar, Oésilo sei liután to’o Pássabe, Nítibe iha ponte Noetoko, tán ne’e ohin ha’u kontente, ita haree komunidade ho lia-na’in sira mós kontente, tanba kada tinan problema iha Noél-Ekat, populasaun labele liu, maibé iha tinan rua nia laran, ita halo preparativu atu halo ponte ne’e, no ohin ita inaugura,” Arsénio Bano ko’alia iha serimónia inaugurasaun ne’e.
Bano agradese ba autoridade lokál sira iha sub-rejiaun Oésilo liuliu suku Usitasa’e, tanba durante ezekusaun konstrusaun ne’e la’o, komunidade kontribui hodi oferese rai no plantasaun, liuliu ponte Bitopa atu liga estrada foun ne’ebé autoridade halo hosi Bitopa ba Oébaha.
Jestór sub-rejiaun Oésilo, Domingos Marques, reprezenta komunidade suku tolu iha sub-rejiaun Oésilo, Usitasa’e Bobometo no Usitaqueno, agradese ba Autoridade RAEOA tanba ho esforsu bele konstrui ponte ne’e atu fasilita komunidade sira.
“Ponte ne’e la’ós ba suku Usitasa’e de’it, maibé Oé-Cusse tomak, tán ne’e lori komunidade sira agradese ba Autoridade RAEOA tanba halo ponte di’ak tebes,” nia orgullu.
Simão Quelo nu’udar abitante lokál kontente, tanba iha tempu udan, labele ultrapasa ba merkadu sira iha Oé-Cusse Vila.
“Ami iha produtu lokál, maibé kuandu tempu udan, ita labele ba fa’an, tanba ami liu mota mós la’ós metru maibé kilómetru, hahú hosi Bitopa ba to’o Nianapu suku Bobometo, maibé ponte harii ona, entaun ha’u sente kontente, tanba komesa tinan ne’e ba oin ami bele liu ona,” nia orgullu.
Ponte Bitopa ezekuta hosi kompañia Am-Lhichoe Unipesoál, Lda, ho valór kontratu $406,945.00, Autoridade RAEOA aloka hosi Orsamentu Jerál Estadu (OJE) 2022 nian, ho durasaun servisu fulan-haat.
Notísia relevante: Ponte Bitopa-Noetoko konstrui uza dezeña ponte antiga Oébaha no Bihala
Jornalista : Abílio Elo Nini
Editór : Evaristo Soares Martins
