OÉ-CUSSE, 24 jullu 2023 (TATOLI) – Prezidente Autoridade RAEOA, Arsénio Paixão Bano, informa, konstrusaun projetu ponte Bitopa no Noetoko, tékniku sira hosi Diresaun Rejionál Infraestrutura (DRI) dezeña tuir ponte antiga Oébaha lokaliza iha suku Bobometo, sub-rejiaun Oésilo no ponte Bihala lokaliza iha suku Bobokase, sub-rejiaun Pante Makasar.
“Ha’u atu dehan de’it, ba maluk balu la kompriende kona-bá ponte Bitopa no Noetoko ne’e atu liga komunidade sira iha área rurál ho Oé-Cusse, balu hateten dehan, ne’e la kualidade, maibé ita haree ponte ida iha Bihala, Bobokase ne’e, Indonézia mak halo uza duni estilu hanesan ponte Bitopa ho Noetoko, agora tinan 30 liu ona seidauk aat,” Arsénio Paixão Bano ba jornalista sira iha Oé-Cusse, segunda ne’e.
Notísia relevante: Autoridade lokál nia esperansa ba futuru konstrusaun ponte Bitopa-Noetoko
Prezidente Autoridade ne’e hatutan, la’ós ponte Bihala de’it maibé ponte ida mós iha Oébaha, suku Bobometo, Indonézia mak halo uza estilu hanesan Bitopa ho Noetoko, agora tinan 30 liu ona seidauk aat.
“Maibé ponte Indonézia halo ne’e milimetru 5 de’it, iha Bitopa ho Noetoko ne’e milimetru 7, todan no kualidade, ida-ne’e halo ho espesifikasaun téknika, enjeñeiru sira mak halo, ba survei, halo dezeñu, la’ós prezidente mak halo,” nia klarifika.
Tan ne’e, nia garante projetu sira-ne’ebé konstrui ona sei dura to’o tinan barak, hanesan Ponte Noefefan no estrada nasionál liga Oénunu, sub-rejiaun Nítibe.
“Ita labele halo ponte hotu-hotu hanesan ho ponte Noefefan, balu dehan nia estilu ladi’ak, maibé ita halo estrada rurál hanesan ho estrada rejionál, la hanesan ho estrada nasionál, tanba ne’e maka ita nia servisu ne’e la’o, tinan rua tolu tán ita Oé-Cusse ne’e asesu ba estrada hotu-hotu sei la’o, ita hahú ho reabilitasaun, prepara ba estrada, depois ita ba alkatroada ita sei to’o ne’ebá,” nia katak.
Entretantu, konstrusaun ponte Bitopa kompañia Am-Lhichoe Unipesoál, Lda, ezekuta ho valór kontratu $406,945.00, orsamentu ne’e, Autoridade RAEOA aloka hosi Orsamentu Jerál Estadu (OJE) 2022, no progresu fíziku daudaun ne’e atinje ona 62,27%.
Nune’e mós, projetu ponte Noetoko kompañia Lifau Indah Unip, Lda ho valór kontratu $ 625, 451. 54, osan ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun servisu durante fulan-neen, no progresu fíziku daudaun ne’e atinje ona 67%.
Notísia relevante:Progresu projetu ponte Bitopa-Noetoko liu ona 50%
Jornalista: Abílio Elo Nini
Editór: Evaristo Soares Martins
