OÉ-CUSSE, 07 juñu 2023 (TATOLI) – Kontrusaun projetu ponte Bitopa no ponte Noetoko iha Rejiaun Administrativa Espesiál Oé-Cusse (RAEOA), nia progresu fíziku daudaun ne’e liu ona pursentu 50.
Projetu ponte Bitopa lokaliza iha bairru Hau-Ana, aldeia Boqui, suku Usitasa’e, sub-rejiaun Oésilo, no ponte Noetoko lokaliza iha aldeia Kuanobe, suku Ban-Afi, sub-rejiaun Nítibe.
Notísia relevante: Udan difikulta konstrusaun ponte Noetoko no Bitopa
Prezidente Autoridade RAEOA, Arsénio Paixão Bano, informa, projetu ponte rua ne’e sei sai solusaun ba sirkulasaun ema no transporte sira iha tempu udan, nune’e nia espera kompañia sira bele aselera molok tempu udan.
“Ha’u horsehik ba observa, hamutuk tékniku sira hosi obra públika, projetu rua ne’e la’o di’ak no atinjementu liu ona 50%, horsehik iha ne’ebá ita husu ba kompañia no traballadór sira atu kontinua servisu, servisu tenki la’o, para antes udan mai komunidade no transporte sira bele uza ona ponte rua ne’e,” Arsénio Paixão Bano, informa ba Agência Tatoli liuhosi whatsapp iha Oé-Cusse, kuarta ne’e.
Ezekutivu ne’e, espera durante ezekusaun kompañia sira sei la infrenta problema, tanba materiál kuaze kompleta ona iha terrénu, nune’e nia enkoraza persiza kumpri dokumentu kontratu.
“Ponte sira ita lansa iha kotuk, maibé foin daudaun tempu udan, entaun difikulta kompañia sira atu kontinua obra sira, maibé ita haree iha fulan maiu to’o ohin kompañia sira hahú lori ona materiál sira iha fatin, entaun ita espera bele finaliza iha tempu badak antes udan monu rai,” nia afirma.
Notísia relevante: Empreza Am-Lhichoe no Lifau Indah sei konstrui ponte Bitopa-Noetoko
Diretor Diresaun Rejionál Infraestrutura, Candido dos Reis Amaral, esplika, konstrusaun ponte Bitopa daudaun ne’e nia progresu fíziku atinje ona 52% no ponte Noetoko atinje ona 61%.
“Objetivu hosi vizita ne’e atu Prezidente Autoridade hare direta progresu servisu konstrusaun Ponte Bitopa ho Noetoko, hodi enkoraja kompañia sira bele aselera servisu tuir kontratu, ne’ebé autoridade RAEOA propoin ona,” nia katak.
Candidu Amarál, esplika, distánsia ponte Bitopa nia naruk metru 64 kompleta kedan ho protesaun moru no gabiaun metru 170, no projetu ne’e envolve traballadór iha suku na’in-20.
Nune’e mós ba ponte Noetoko inklui ponte ki’ik rua iha Nefometan suku Banafi, nia distánsia medida naruk metru 160 no kompleta mós ho moru no gabiaun, no projetu ne’e envolve traballadór kuaze na’in-40.
Entretantu, kontrusaun ponte Bitopa ezekuta hosi kompañia Am-Lhichoe Unipesoál, Lda, ho valór kontratu hamutuk $406,945.00, osan ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun serbisu fulan-haat, hahú novembru 2022 to’o marsu 2023.
Kona-bá projetu ponte Noetoko ezekuta hosi kompañia Lifau Indah Unip. Lda ho valór kontratu $ 625, 451. 54, osan ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun servisu durante fulan neen.
Notísia relevante: Autoridade lokál nia esperansa ba futuru konstrusaun ponte Bitopa-Noetoko
Jornalista: Abílio Elo Nini
Editór: Evaristo Soares Martin
