BOBONARO, 21 setembru 2023 (TATOLI) – Autóridade Munisípiu Bobonaro, lideradu Ernesto de Oliveira Barreto, husu xefe aldeia no xefe suku sira atu kontrola menu ai-haan merende eskolár nune’e labele fó efeitu pozitivu ba estudante sira-nia saúde.
Ernesto hato’o apelu ne’e tanba nia parte simu informasaun katak, Ekipa Jestaun Programa (EJP) no kuziñeira sira iha fatin balu fornese ai-haan la tuir menu ne’ebé estipula iha matadalan programa merenda eskolár.
Eis administradór postu Bobonaro ne’e hatutan, iha madatalan programa ne’e hateten 75% tau prioridade ba produtu lokál, maibé nia sujere ba EJP no kuziñeira sira labele loron loron sosa de’it fehuk no ai-farina, tanba ne’e labarik sira baruk atu haan.
“Ha’u husu ba xefe aldeia no xefe suju sira tau-matan ba programa merenda eslolár, labele kada loron ai-farina ka fehuk hela de’it,” nia hateten iha salaun administrasaun postu Bobonaro, kuarta ne’e.
Autoridade munisípiu ne’e mós husu EJP-kuziñeira atu servisu ho profesionál no labele aplika sistema familiarizmu durante fó atendimentu ba estudante sira.
Ba kestaun ne’e, Diretór Servisu Munisipál Bobonaro, Crispim Moniz, konfirma antes implmenta programa ne’e Ministériu Edukasaun no Ministériu Administrasaun Estatál no Parseiru WFP tur hamutuk atu prepara menu fiksa, maibé to’o agora seidauk akontese.
Nia hatutan, foin lalais ne’e Ministra Edukasun mós ko’alia maka’as ba kestaun ne’e, nune’e Servisu Munisipál Edukasaun iha hanoin katak ba oin sei tuur hamutuk ho parte relevante sira atu prepara menu ida hodi implementa iha eskola sira.
“Ami sei hasai sirkular ida, ha’u hanoin líder komunitária sira konvoka enkontru ho komunidade, depois bele fornese produtu lokál ba eskola,” nia fó hanoin.
“Sira tenke akompaña kada loron, implementasaun programa ne’e, iha-ne’ebá iha formatu oinoin, ida kona-bá kompra diária, osan ne’e EJP foti tiha iha edukasaun iha konta bankária BNCTL, sira fila osan ne’e entrega fali ba kuziñeira sira kompra, iha-ne’ebá kompra diária ne’e tenke hetan asinatura hosi diretór eskola, tanba ne’e tenke haree di’diak sira hola duni ka lae,” nia akresenta.
Enkuantu autoridade munisípiu Bobonaro aloka orsamentu ba programa merenda eskolár tinan ne’e hamutuk $1,658,459,88, hosi montante ne’e fahe ba nível pre-eskolár 40 ho valór $138,482.82 no ensinu báziku 136 ho valór orsamentu $1,519,977.06
Totál estudante ne’ebé sei asesu programa refere hamutuk 26,862 komposta hosi nível pre-eskolár 2,243 no ensinu báziku 24,619.
Notísia Relevante:Governu-WFP entrega untensilus dapur 13 ba EBC iha Maliana
Jornalista: Sérgio da Cruz
Editór: Evaristo Soares Martins
