BAUCAU, 21 setembru 2023 (TATOLI) – Serbisu Munisipál Saúde Baucau, rejista labarik sofre má-nutrisaun hosi fulan-janeiru to’o agostu hamutuk na’in-13.
Responsável programa nutrisaun serbisu munisipál saúde Baucau, Luiza Amarál, esplika, hosi labarik nain-13 ne’ebé sofre má-nutrisaun grave identifika iha sentru saúde Tirilolo, postu Baucau Vila, sentru saúde Bucoli no sentru saúde Laga ne’ebé atuál kontinua hetan akonsellamentu kada sentru saúde sira.
“Hosi fulan-janeiru too agostu tinan-2023 labarik idade hosi mamuk to’o fulan 59 ne’ebé sukat liman kabun, altura hamutuk na’in-13 ne’ebé sofre má-nutrisaun grave,” Responsável programa nutrisaun hateten iha Vila Antiga, kinta ne’e.
Labarik sira-ne’e identifika liuhosi diagnosa sofre má-nutrisaun hanesan tetu todan, sukat altura no sukat liman inklui kabun nune’e presiza kontinua halo akonsellamentu bai nan-aman hanesan halo tratamentu ho loloos.
Prosesu programa má-nutrisaun implementa iha kada sentru saúde no postu saúde sira no atividade SISKA ne’ebe foka liu iha labarik ho idade tinan mamuk to’o semana-59 hanesan halo akonsellamentu ligadu ho konsume ai-haan lokál, liuliu ai-haan fó forsa, bahuras no proteje ne’ebé tenke fó haan variedade no seidauk fó suplementu tanba fasilidade saúde provizóriu laiha ai-moruk.
“Ai-haan ne’ebé sempre fó haan labarik mak marungi hanesan kahur ba sasoro bainhira konsume iha loron to’o kalan nune’e bele rekupera fali,” Luiza Amarál akresenta.
Kauza má-nutrisaun akontese bainhira prátika kuidadu ne’ebé laloos katak labarik konsumu susu-been inan to’o de’it fulan-rua ba tolu nune’e hamosu krekras inklui sofre moras má-nutrisaun.
Prosesu má-nutrisaun ne’ebé laiha moras hala’o atendimentu iha fasilidade saúde, enkuantu ne’ebé identifikadu sofre tán moras seluk presiza kontinua halo tratamentu iha Ospitál Rejinonál Eduardo Ximenes (HorEX, sigla portugés).
Programa nutrisaun implementa atividade hanesan agrikultura sensivel ba nutrisaun ne’ebé sempre identifika ai-haan lokál kada fulan ba inan-aman sira nune’e informadu hodi fó haan labarik sira.
Responsável programa nutrisaun, apela ba inan-aman sira atu kontinua rútina fó susu-been inan ba labarik sira no husu ba governu sentrál atu aselera suplementu hanesan prevensaun mikro nutriente rahun no suplementu ba tratamentu nune’e bele halao tratamentu ba labarik sira-ne’ebé identifika sofre má-nutrisaun.
Jornalista : Natalino Belo
Editór : Evaristo Soares Martins
