DILI, 26 setembru 2023 (TATOLI)—Ministru Obra Públika, Samuel Marçal, klarifika katak prezensa Kay Olok Gusmão iha Ministériu Obra Públika (MOP) la’ós nu’udar asesór prinsipál, maibé hanesan voluntáriu.
Biban ne’e, Ministru rejeita informasaun ne’ebé lansa iha públiku liuhosi rede sosiál facebook, katak Kay Olok nu’udar asesór prinsipál.
“Tanba sá mak preokupa ho Kay Olok, nia la’ós timor-oan? nia mai iha Ministériu Obra Públika para aprende labele ka? lei ruma bandu nia labele aprende? Sé mak hateten nia asesór prinsipál, nia mai aprende iha ministériu, seidauk iha kontratu ida ba nia,” Samuel Marçal hateten ba jornalista sira iha edifísiu MOP, Caicoli, tersa ne’e.
Notísia relevante : Ministru Samuel Marçal enkoraja funsionáriu BTL, E.P servisu ho responsabilidade
Tuir observasaun Agência Tatoli nota katak durante ne’e Kay Olok sempre akompaña Ministru Samuel Marçal partisipa iha reuniaun Konsellu Administrasaun Fundu Infraestrutura (KAFI) no reuniaun koordenasaun no diskusaun planu ministériu ne’ebé envolve dirijente, entidade hosi instituisaun tutela no parseiru sira, tamba ne’e mosu diskusaun públiku kona-ba ninia prezensa.
Kay Olok Gusmão nu’udar oan daruak hosi atuál Primeiru-Ministru, Kay Rala Xanana Gusmão no inan Kirsty Sword Gusmão, ne’ebé daudaun kompleta ona idade 21.
Jornalista : Antónia Gusmão
Editora : Julia Chatarina
