BAUCAU, 26 setembru 2023 (TATOLI) – Serbisu Munisipál Agrikultura Baucau tuir planu sei fila-rai komunidade hodi prepara kondisaun antes udan monu.
Xefe departamentu programa estensaun, Marcal Ximenes, esplika, ministéiru apoia ona mina hodi enxe ba tratór hamutuk tonelada lima no mekanizasaun sei manutensaun tratór antes hahú responde pedidu hosi komunidade relasiona ho fila-rai iha postu admistrativu sira.
“Tempu badak bele ona tún ba terrenu atu fila-rai ba ita-nia komunidade agrikultór sira,” Xefe departamentu programa estensaun hateten iha Vila Nova, tersa ne’e.
Serbisu agrikultura tuir planu sei fila-rai hamutuk ektare rihun-ida resin hodi prepara kondisaun antes udan monu rai bazea ba estoke mina ne’ebé apoia hosi nasionál.
Bazea ba pedidu ne’ebé hato’o, maioria agrikultór sira maihosi postu administrativu Baucau Vila iha suku Gariuai, Quelicai, suku Mulia, Laga Binagua no Vemase, suku Ostiku, Luilubu no Uatulari no parte diresaun labele responde hotu tanba tuir kondisaun mina.
“Ita labele responde hoto pedidu tanba estoke mina, kada tinan hosi nasionál apoia mina litru rihun-lima,” Marcal Ximenes akresenta.
Serbisu agrikutura Baucau simu pedidu proposta hosi komunidade hamutuk 600 hodi prepara antes udan monu rai ba époka tinan ne’e.
Tuir dadus tratór ne’ebé iha hamutuk 14 komposta hosi ualu mak funsiona, ida kondisaun paradu no tolu sei iha faze manutensaun.
Jornalista : Natalino Belo
Editór : Evaristo Soares Martins
