OÉ-CUSSE, 29 setembru 2023 (TATOLI) – Diretór Komisaun Nasionál Eleisaun (CNE, sigla portugés) Rejiaun Administrativa Espesiál Oé-Cusse Ambeno (RAEOA), Tomas Oqui Meta, informa, atividade edukasaun sívika hodi prepara ba eleisaun suku, daudaun ne’e hela de’it suku haat iha sub-rejiaun Pante Makasar, enkuantu suku 14 iha sub-rejiaun Oésilo, Pássabe no Nítibe konklui ona.
Notísia relevante: Notísia relevante: Eleisaun suku: Meza eleitorál suku simu kandidatura iha 13 outubru
Diretór Komisaun Nasionál Eleisaun, Tomas Oqui Meta, hateten, atividade edukasaun sívika ne’e importante ba eleitór sira iha suku no aldeia.
Hanesan matadalan Lei númeru 9/2016 kona-bá prosedimentu aprezentasaun kandidatura no lala’ok eleisaun ba membru orgaun suku sira no oinsá hato’o keisa no reklamasaun, karik mosu irregularudade iha prosesu eleisaun.
“Atividade ne’e ita komesa iha loron 01 setembru, abertura iha sub-rejiaun Pássabe suku Malelat, agora kompleta fulan ida ona, ne’ebé atividade ita hala’o kuaze remata ona iha sub-rejiaun tolu, hosi Pássabe mai Oésilo no kontinua ba Nítibe, ne’ebé ami tama hamutuk 14, agora hela suku haat iha sub-rejiaun Pante Makasar, Cunha, Lalisuk, Nípani no Costa,” Tomas Oqui Meta ba Tatoli iha Oé-Cusse, sesta ne’e.
Nia informa, programa edukasaun sívika ne’e, hala’o iha suku no aldeia de’it, la inklui eskola no fatin públiku sira, maibé parte CNE no STAE sei monta aviza liuhosi publisidade.
Nia argumenta, iha edukasaun sívika iha suku no aldeia sira, komunidade no autoridade lokál hato’o rekomendasaun no sujestaun kona-bá lala’ok eleisaun nian.
“Rekomendasaun barak, maibe ita labele responde tanba ne’e ita halo sosializasaun de’it ona, hanesan persiza tau foto iha buletin, aldeia no delegadu-delegada sira, persiza monta sentru votasaun iha bairru sira no eleisaun segunda volta fó tempu loron ida tan no rekomendasaun seluk liga ho kondisaun dalan,” nia katak.
Notísia relevante: STAE RAEOA propoin viatura 30 ba eleisaun suku
Entretantu, kona-bá eleitór ne’ebé atu partisipa iha eleisaun suku, daudaun ne’e parte STAE Oé-Cusse, dezloka ona tékniku sira iha nasionál hodi halo sinkronizasaun, maka foin hatene dadus fiksa kona-bá eleitór sira.
Maibé bazea dadus eleitór ne’ebé partisipa iha eleisaun parlamentár iha loron 21 fulan maiu tinan 2023 hamutuk hamutuk 54.291, mane 27.681 no feto feto 26.610.
Kona-bá sentru votasaun nian, STAE identifika ona sentru votasaun 63, destaka iha aldeia 63 kabe ba suku 18 iha territóriu Oé-Cusse.
Notísia relevante: CNE abertura edukasaun sívika iha Pássabe prepara ba eleisaun suku
Jornalista: Abílio Elo Nini
Editór: Evaristo Soares Martins
