OÉ-CUSSE, 11 outubru 2023 (TATOLI – Diretór Rejionál Agrikultura RAEOA Cirilio dos Remédios Baba, informa, tratór 14 mak daudaun ne’e prepara ona hodi halo operasaun programa fila-rai ba komunidade sira-nia to’os iha fulan-outubru ne’e.
“Iha 2010 Governu aloka 21 mai iha RAEOA, maibé agora 14 maka kondisaun di’ak, hitu avaria hela, entaun tratór 14 ne’e maka agora ita prepara ona atu fila-rai ba komunidade sira-nia to’os,” Cirilo Baba, ba Tatoli iha Oé-Cusse, kuarte ne’e.
Notísia relevante: MAP RAEOA identifika kondisaun tratór molok halo leilaun
Cirilo Baba, hateten loloos tratór iha 17, maibé iha tolu nia ekipamentu ida, naran sarua (mákina) mak menus, entaun 14 maka sei halo operasaun.
“Ita-nia planu atu fila-rai ba komunidade sei hahú semana oin, outubru nia laran, tanba iha Oé-Cusse aplika ona komtribuisaun hosi to’os na’in-sira, katak Governu prepara tratór komunidade prepara kombustível,” nia akresenta.
Nia informa, oras ne’e to’os na’in balu, submete ona pedidu iha diresaun husu atu fasilita tratór hodi fila-rai, tanba kada tinan bazea ba proposta ne’ebé propoin hodi suku sira.
“Agora ita hein de’it koordenasaun ho lojístika, atu komunika ho patrimóniu Estadu nune’e bele fasilita, tanba pedidu hosi Departamentu Agrikultura Bázika Familiár, hato’o ona mai diresaun atubele fornese kombustível hodi tún ba baze,” nia katak.
Entretantu, hosi Diresaun Rejionál Agrikultura, daudaun ne’e prepara ona tratorista hamutuk na’in-23 inklui mékniku.
Notísia relevante: Agrikultura Oé-Cusse aloka $9,120.00 kompra fini prepara ba époka 2024
Jornalista: Abílio Elo Nini
Editór: Evaristo Soares Martins
