DILI, 18 outubru 2023 (TATOLI) – Ezame nasionál arranka iha segunda-feira ne’e, maibé estudante 137, husi totál 15.899 iha Dili la realiza ezame tanba problema ho dokumentu eskola nian.
Inspetora-Jerál Ministériu Edukasaun, Maria Manuela Gusmão, informa husi totál ne’e estudante na’in-137 laiha diploma no 10 falsifika diploma.
“Estudante na’in-137 ne’e la submete sira-nian dokumentu, tanba ne’e ministériu labele fó lisensa ba sira atu tuir ezame. Tanba laiha ema ida maka hatene antes ne’e sira eskola ka la’e? Se eskola karik iha ne’ebé? Se sira hatama diploma duni entaun bele reforsa katak sira eskola duni. Agora, ami halo hela investigasaun ne’ebé ami la fó lisensa ba sira atu tuir ezame nasionál”, inspetora dehan ba Tatoli, iha Vila Verde, ohin.
Tanba ne’e, inspetora husu ona ba estudante sira ne’e atu prepara sira-nian dokumentu hodi aprezenta no bainhira hetan ona konsiderasaun sira bele realiza ezame. Kuandu sira la hatudu evidénsia ruma ho dokumentu komprovativu sei la ezame.
Ba estudante na’in-10 ne’ebé konsidera falsifika dokumentu, inspetora afirma katak sira sei lahetan duni direitu iha ezame nasionál, tanba hahalok ida ne’e konsidera ladi’ak no Ministériu Edukasaun tenke evita situasaun ne’e.
“Ita labele tolera hahalok sira hanesan ne’e. Sé mak falsifika dokumentu sei lahetan direitu atu realiza ezame nasionál tanba ita hanesan ministériu ida ne’ebé sai ezemplu ba ema hotu tenke evita hahalok aat sira ne’e”, dehan.
Alunu sira ne’ebé laiha dokumentu no falsifika diploma ne’e mai husi Eskola Sekundária Jerál Fitun Naroman Timor-Leste (FINANTIL), 05 de Maio Becora, 04 de Setembro UNAMET Balide no 10 de Dezembro Comoro.
Rekorde katak ezame nasionál akontese, entre 16 no 18 outubru. Tuir dadus husi Ministériu Edukasaun, estudante 9.o no 12.o anu hamutuk 56.498 iha territóriu mak realiza ezame nasionál. Husi totál ne’e, 29.100 husi ensinu báziku, 23.256 sekundáriu jerál no 4.142 eskola tékniku vokasionál.
Notísia relevante: Servisu Edukasaun Viqueque identifika estudante sia la partisipa ezame nasionál
Jornalista: Tomé Amado
Editora: Maria Auxiliadora
