DILI, 23 outubru 2023 (TATOLI)–Diretór Nasionál Relasaun Traballu iha Sekretaria Estadu Formasaun Profisionál Empregu (SEFOPE), Ângelo dos Santos Veloso, hateten, tuir loloos revizaun ba Lei saláriu mínimu ne’e kada tinan-rua tenke halo revizaun tanba realidade kustu vida kada tinan diferente.
“Tinan ualu resin ona ita seidauk halo revizaun, ne’ebé agora tempu ona atu halo revizaun tanba saláriu kada fulan $115 ne’e la sufisiente ba ita-nia maluk traballadór sira,” Diretór dehan liuhosi entrevista eskluziva live streaming Agência Tatoli, I.P, iha estúdiu Farol, segunda ne’e.
Diretór rekoñese, kona-ba saláriu mínimu sensitivu tebes tanba Lei Traballu aliña c hateten katak Konsellu Nasionál Traballu (KNT) propoin revizaun saláriu mínimu ba konsellu Ministru hodi halo aprovasaun.
“Entaun saida mak ami halo iha tinan hitu liubá, ami halo peskiza tanba revizaun ba saláriu mínimu la’ós tur ba hasa’e saláriu. Iha tinan-haat liubá Konsellu Nasionál hetan apoia hosi International Labour Organiszation (ILO) halo peskiza ba traballadór no empreza, iha ne’e haree liubá lala’ok traballadór ligadu ho implementasaun saláriu mínimu $115 ne’e responde ona sira-nia ekonomia família ka lae. Ami tuur hamutuk tanba iha Konsellu Nasionál Traballu ne’e envolve hosi Sindikatu Traballadór, Reprezentante Traballadór no Reprezentante Governu,” nia haktuir.
Notísia relevante : KSTL husu Governu prioritiza revizaun saláriu mínimu ba traballadór
Rezultadu peskiza ne’e Konsellu Nasionál Traballadór realiza semináriu ida hodi bolu ekonomista sira hodi aprezenta rezultadu peskiza hodi husu sira-nia hanoin kona-ba vantajen no dezvantajen. Hafoin semináriu Konsellu Nasionál Traballu, tur hamutuk fali hodi analiza hanoin sira hodi deside saláriu mínimu ne’ebé mak atu propoin molok aprezenta ba Konsellu Ministru.
“Iha diskusaun sindikatu ho empregadór halo negosiasaun, ezemplu sindikatu hakarak $200 maibé empregadór dehan labele. Momentu ne’ebá ami propoin $150, sira konkorda ida-ne’e mak ami submete ba Konsellu Ministru liuhosi Ministrériu Koordenadór Asuntu Ekonómiku (MAKE). Iha mandatu VIII Governu konsege prevee iha Grande Opsaun Planu (GOP) $135. Maibé saláriu mínimu ne’e arranka kedas ho dekretu-lei rasik atu esplika oinsá atu hetan $135 ne’e, entaun ninia kuantidade ne’e hakerek iha Lei GOP maibé ninia dekretu-lei aprova entaun ami mós labele publika ba públiku katak lei saláriu minímu ne’e revee ona, ne’ebé to’o agora sei nafatin la’o ho $115,” nia akresenta.
Daudaun Diresaun Nasionál Relasaun Traballu servisu hamutuk ho Gabinete Jurídiku SEFOPE nian prepara hela atu haruka fali revizaun lei saláriu mínimu ne’e ba Konsellu Ministru.
Jornalista : Antónia Gusmão
Editora : Julia Chatarina
