DILI, 06 novembru 2023 (TATOLI) – Grupu Artezenatu hamutuk 11 hosi munisípiu sira promove hela sasán kulturál Timor-Leste nian liuhosi feira ne’ebé hala’o iha sentru kulturál Jorge Sampaio, Embáixada Portugál-Dili.
Grupu artezenatu hirak ne’e mak hanesan, hosi Atauro mak grupu Ai-hanek, Biojoia, Haburas Homan, Hosana no Estatua Manukoko, grupu Grupu Estrela, Linda Hadomi Kultura, Empreza Arte Vida, Bobometo husi Dili, Grupu Moris Dame no Homan Moris Mesak husi Likisá.
Artezenatu sira aprezenta produtu sira hanesan Tais Feto no Mane, selendang, moxila husi homan akadiru no Tais, asesoria mak brinkus, korrente, pulseira, porta moeda no seluk tan.
Objetivu husi feira ne’e hanesan meiu ida hodi halo promosaun ba grupu artezenatu hodi asesu ba iha merkadu, tanba sira faan de’it iha sira nia fatin ema barak mak lahatene. Nune’e presiza promove grupu idak-idak nia atividade ho kualidade produtu atu ema bele sosa.
“Feira artezanatu ne’e hanesan atividade ikus husi produsaun artístiku husi Projetu “Produsaun ao Serviço da Igualdade e Inclusão” liuhusi formasaun Empreendedorismu ba kultura iha Timor-Leste. Ami hanesan organizasaun implementador ne’ebé hetan apoio fundu rihun $5 husi Embaixada Portugál ho durasaun fulan-neen”, hateten Jerente Naun Governamental Empreza Di’ak, Agostinho Sena de Jesus, ba agência TATOLI,Dili.
Jerente ne’e esplika grupu sira ne’e hetan formasaun husi Empreza Di’ak no halo inovasaun ba produtu artístiku sira hodi bele faan no bele hetan rendimentu hodi bele sustente ba sira ekonomia familiár.
Biban hanesan, Grupu Homan Moris Mesak husi Likisá, Maria Natalina Ramos afirma faan nia produtu husi $0.50 to’o $20 husi kada produtu ne’e depende husi kualidade no tamañu.
“Ha’u kontente partisipa iha feira ne’e tamba ha’u bele lori ha’u nia produtu kohe, pasta no buat seluk tan hodi mai faan iha feira ne’e”, nia agradese.
Alende ne’e, Koordenadór grupu Bobometo, Rosalina da Costa, reforsa halo produsaun artístiku hanesan Tais feto no mane, selendang, porta moeda, pasta no asesoriá sira hanesan korenti, brinkus no seluk tan hodi hetan rendimentu.
Produtu artístiku sira ne’e fa’an ba iha merkadu liuhusi feira no online ho presu entre $50 to’o $60.
“Ami fa’an produtu sira ne’e iha Timor Plaza, Aero-Portu, Hotel Timor no oportunidade feira, no ami nia fatin iha Bebonuk nune’e mós ami halo promosaun iha Facebook no ema sosa ho presu mínimu $0.50 no másimu $60”, nia afirma.
Jornalista: Jesuína Xavier
Editór : Florencio Miranda Ximenes
