DILI, 10 novembru (TATOLI)—Prezidente Komisaun C trata asuntu Finansa Públika iha Parlamentu Nasionál (PN), Deputada Cedelizia dos Santos, prefere IX Governu konstituisionál bele submete proposta Orsamentu Jerál Estadu (OJE) 2024 mai PN debate ho karáter urjénsia.
Notísia Relevante: Governu sei submete proposta OJE 2024 ba PN iha 24 novembru
Tuir kalendáriu Governu nian atu submete proposta OJE 2024 mai PN iha 24 novembru 2023, ida-ne’e la kontra lei Orsamentu Retifikativu (OR) 2023 prevista katak la’ós Governu tenke submete iha tinan inísiu governasaun no 15 outubru tuir lei enkuadramentu orsamentu, maibé fulan lima konta hosi sira toma pose 01 jullu.
“Bainhira sira submete mai Parlamentu iha 24 novembru kumpre hela lei. Agora tempu to’o ka lae, Parlamentu seidauk hatene pedidu ne’ebé mak Governu hatama ne’e ho pedidu urjénsia ka normál. Se pedidu urjénsia entaun iha tempu loron 30 ne’e konta hosi 24 novembru,” nia hateten ba jornalista sira iha uma fukun PN, sesta ne’e.
Komisaun C halo ona kalendáriu tentativa, se pedidu urjénsia bele to’o iha 20 dezembru hanesan ne’e, PN bele submete ona ba Prezidente Repúblika halo promulgasaun no signifika ikatak ha 01 janeiru 2024 ne’e la presiza uza osan duodésimu.
Maibé, tuir nia, karik pedidu debate mai ho karáter normál tuir rejimentu PN tenke uza loron 45, entaun nia iha impaktu ba iha diskusaun bele to’o jeneralidade iha janeiru 2024 no posibilidade sei uza rejime duodésimu.
“Tanba ne’e mak ami fiar, laiha problema. Governu ne’e foun, nia bele hatama ho pedidu urjénsia no Parlamentu sei jere kalendáriu to’o hela komisaun C nian kobre hela tempu sira-ne’e,” nia hateten.
Jornalista : Nelson de Sousa
Editór : Cancio Ximenes
