VIQUEQUE, 12 novembru 2023 (TATOLI)–Ministra Edukasaun (ME), Dulce de Jesus, hateten komemorasaun 12 novembru ba dala-32 (12 novembru 1991-12 novembru 2023) iha Viqueque ne’e, foti sai hanesan lisaun hosi valór nasionalizmu, patriotizmu no unidade ba interrese nasionál.
Notísia Relevante: Komemora 12 novembru hametin estudante sira-nia nasionalizmu no patriotizmu
“Ita tau interrese nasaun nian aas liu ba interrese hotu. Mai hamutuk ho objetivu ida de’it mak unidade pás no progresu. Oras ne’e daudaun ita tama mós ba era glovalizasaun, era dizitalisaun, era ne’ebé presiza intelijensia, era kreatividade no inovasaun oioin ne’ebé sai dezafiu ba juventude no estudante sira-nia moris. Joven sira tenke matenek hodi desidade saida mak di’ak no utíl ba joven sira-nia futuru,” Ministra Dulce hateten liuhosi ninia diskursu, iha semónia komemorasaun masakre 12 novembru iha kampu demokrasia Viqueque, domingu ne’e.
Tanba ne’e, ministra ne’e enkoraja estudante sira tenke estuda hodi sai matenek ne’ebé kreativu, inovativu no kritiku partisipa iha atividade extrakríkulár hakbiit poténsia akademika no naun akademika.
“Ambitu komemorasaun 12 novembru ne’e, ha’u hakarak enkoraja ha’u-nia estudante sira estuda hodi hakbiit kapasidade lideransa liuhosi asosiasaun estudantil kada eskola sira,” nia dehan.
Tuir nia, esperiénsia juventude 1975 to’o juventude 1991 ne’e, tenke sai referensia hodi dezenvolve kapasidade intelektual iha prosesu transformasaun dezenvolvimentu masionál.
Joven tenke sai ajente transformadór, ajente kontru sosiál no ajente dezenvolvimentu hodi transforma sosiade ho valór demokrasia, valór pás no unidade nasionál.
Tanba ne’e, juventude tenke koloka aan no pro-ativu iha atividade sosiál nu’udar meu enkontru ba ema ka grupu iha sosidade, hodi hametin reasaun nu’udar ema ka fraternidade.
Tan ne’e, komemorasaun 12 novembru ne’e sai hanesan parte ida ba aprendizajen ba estudante no profesór sira hotu, tanba dalabarak iha livru barak mak estudante no profesór sira aprende ona liuhosi lee de’it, maibé ida-ne’e lori sovrevibente 12 novembru sira konta sira-nia istória.
Komemorasaun 12 novembru ba dala-32 iha Viqueque ne’e, partisipa hosi adiministradór munisípiu Viqueque Januario Soares “Bolly”, diretór eskola no diretór liña ministériu sira, sovreviente 12 novembru, inan-amán saúdozu Sebestião Gomes, veteranu Viqueque no estudante sira iha postu administrativu Viqueque Vila.
Notísia Relevante: Pe. Andrew: “Eroi sira mate, ita tenke lori nasaun ba oin”
Jornalista : Vitorino Lopes da Costa
Editór : Cancio Ximenes
