DILI, 12 novembru 2023 (TATOLI)–Vise Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, husu ba Ministra Edukasaun orienta eskola sira komemora loron nasionál iha ida-idak nia eskola, nune’e estudante sira bele hatene.
Notísia Relevante: Masakre Santa Cruz hanesan lisaun ida ba jerasaun foun sira
“Komemorasaun loron nasionál sira hanesan loron 12 novembru ne’e importante tebes ba jerasaun foun sira liuliu estudante sira atu hatene, nune’e bele hametin sira-nia nasionalizmu no patriotizmu nu’udar timoroan ne’ebé sei kontinua hatutan dezenvolvimentu país ida-ne’e iha futuru,” Assanami hateten liuhosi nia diskursu iha komemorasaun loron masakre 12 novembru ba dala-32 (12 novembru 1991-12 novembru 2023) ne’ebé selebra iha semitériu Santa Crús, domingu ne’e.
Komemorasaun sira hanesan ne’e bele halo de’it iha ida-idak ninia eskola no bele delega mós partisipasaun estudante balun iha atividade públiku sira liuhosi eventu reflesaun ruma, hodi nune’e bele aumenta sira-nia koñesimentu.
“Hahú ohin ba oin, bainhira iha selebrasaun nasionál sira, ha’u husu ba ita nia Ministra Edukasaun no Ministru Ensinu Superiór tenke orienta eskola sira atu selebra loron importante sira hanesan ne’e. Labele loron nasionál feriadu, estudante no joven sira ba pasear no la tama eskola hodi komemora loron importante sira-ne’e,” nia dehan.
Ba futuru, nia hateten, labele hanoin loron nasionál sira hanesan 12 novembru, 28 novembru no loron nasionál sira seluk ne’ebé Governu deside ona nu’udar loronnasionál ne’e, membru governu ne’ebé tutela ba área edukasaun tenke orienta estudante sira selebra loron istóriku sira-ne’e.
“Ha’u hanoin ba futuru kuandu iha eventu sira hanesan ne’e, Ministra Edukasaun no Ministru Ensinu Superior Siénsia no Kultura presiza organiza estudante sira atu bele partisipa iha komemorasaun loron istóriku sira hanesan ne’e. Tanba, ita ko’alia beibeik ona kona-ba formasaun karáter maibé ita la fó importánsia ba loron sira-ne’ebé importante. Loron nasionál sira-ne’ebé konsagra iha ita nia konstituisaun halo tiha feriadu depois joven sira ba pasear tiha hodi la hanoin hikas tanbasá mak loron ne’e importante,” nia hateten.
Notísia Relevante: Sé Mak Responsabiliza? Xanana Gusmão!
Jornalista : Tomé Amado
Editór : Cancio Ximenes
