BAUCAU, 13 novembru 2023 (TATOLI) – Eleisaun komunitária volta daruak iha munisípiu Baucau menus eleitór no remata tuir oras ne’ebé determina ona.
Diretór Serbisu Munisipál Sekretariadu Tékniku Administrasaun Eleitorál Baucau, Natividade Freitas Guterres, esplika, prosesu eleisaun volta daruak fasilita ona eleitór sira atu ezerse direitu ho lalais tanba vota de’it ba kandidatura xefe suku.
Fatór ne’ebé halo eleitór menus tanba lei la obriga ema atu vota, alende ne’e eleitór balun sei hanoin tuir prosesu eleisaun hala’o tuir volta daruak hanesan dudu malu no mosu pertubasaun balun nune’e halo ema trauma ba vota.
“Sira-ne’e hotu tuir ita-nia observasaun no hanoin de’it maibé laliuhosi estudu ruma,” Diretór STAE Baucau hateten iha Vila Nova, segunda ne’e.
Kada sentru votasaun iha Baucau laran para iha oras 15:00 úniku aldeia Ana-Ulo, suku Bahú mak eleitór balun iha liña laran maibé hotu-hotu hala’o tuir tempu ne’ebé determina ona tuir lei-númeru 09/2016 kona-ba lideransa komunitária.
STAE deside kada sentru votasaun aumenta kabina hamutuk haat eleisaun ne’e votante ezerse de’it votu ba kandidatura xefe suku inklui aumenta Pesoál Apoia STAE aldeia hamutuk na’in-haat kompostu lista naran na’in-rua no fahe boletín votu na’in-rua.
STAE Baucau mós seidauk simu informasaun kona-ba fallansu ruma iha sentru votasaun sira hanesan ekipamentu lojístika no fallansu tékniku krime eleitorál durante prosesu eleisaun ohin.
“Agora sei kontajen iha kada aldeia no aban mak halo apuramentu iha suku,” Natividade Freitas akresenta.
Xefe aldeia Parlamentu, suku Tirilolo atuál Prezidenti meza asemblea suku, Manuel Freitas, hateten, eleisaun lideransa komunitária volta daruak menus votante tanba konsidera maioria votante aldeia refere hala’o atividade estudu iha Dili.
“Kauze menus, lahanesan volta dahuluk forma iha liña maibe agora vontantes too direita ba vota,” Manuel Freitas hateten.
Tuir observasaun Agência TATOLI iha terrenu, sentru votante iha postu Baucau Vila prosesu votasaun la’o normál no remata tuir oras 03:00 lokraik, úniku aldeia Ana-Ulo, suku Bahú mak sei kontinua vota no remata iha tuku 16:00 nune’e kontinua kedas prosesu apuramentu iha kada aldeia.
Munisípiu Baucau iha eleisaun komunitária volta daruak hamutuk suku 35 hosi kandidatura na’in-70 hafoin volta dahuluk kandidatura na’in-24 eleitu ona nu’udar xefe suku hosi suku 59 iha Baucau.
Jornalista : Natalino Belo
Editór : Evaristo Soares Martins
