BOBONARO, 15 novembru 2023 (TATOLI) – Governu liuhosi Sekretáriu EstAdu Arte no Kultura, Jorge Cristovao no Sekretáriu Estadu Pekuária, kuarta ne’e inaugura Monumentu Liberdade iha postu administrativu Balibo, munisípiu Bobonaro.
Diretór ezekutivu Sentru Nasionál Chega, Hugo Maria Fernandes, hateten monumentu ne’e reprezenta timoroan nia esperansa no jornalista sira-nia vokasaun.
“Liberdade ne’ebé mak ita tau ne’e, Liberdade ba ema hotu, maibé mos fó onra ba jornalista sira-ne’ebé mak mate iha-ne’e no mate iha Timor laran,” nia informa ba jornalista sira, hafoin inagurasaun.
Diretór ne’e husu ba komunidade hotu iha Balibo atu kuida nafatin monumentu ne’e ho di’ak nune’e prezerva ba futuru.
“Tinan tinan ita bele halo fali selebrasaun loron Liberdade Imprensa, ita hotu-hotu mai tau-matan,” nia hateten.
Monumentu ne’e harii iha tinan 2022 ho objetivu atu memoriza moris pasadu ne’ebé dedika sira-nia aan ba povu Timor-Leste ba ukun rasik-an no balun ne’ebé agora sei moris iha vulnerável hela.
Konselleiru Konsellu Imprensa, Amito Araújo, informa, CI mós planu tempu besik sei harii muzeu liberdade iha Balibo.
“Ami diskute ona atubele tau prioridade iha tinan oin, maibé instituisionalmente sei halo koordenasaun ho CNC atubele halo konseitu estratéjiku ba infraestrutura, politikamente ba finanseiru, nune’e ita bele koordena hamutuk atubele realiza,” nia katak.
Objetivu hosi establesimentu muzeu Liberdade ne’e oinsá atu halo reflesaun ba akontesimentu istoria 16 outubru 1975 ne’ebé jornalista estranjeiru na’in-lima mate ho kruél.
Notísia relevante: “Balibo Five” – reflesaun ida: Oinsá banati?
Jornalista: Sérgio da Cruz
Editór: Evaristo Soares Martins
