DÍLI, 21 novembru 2023(TATOLI) – Eis Xefe Estadu Maiór Jenerál FALINTIL-Forsa Defeza Timor-Leste, Tenente Jenerál, Lere Anan Timur, relata katak konstrusaun ba Ró Haksolok nian iha Portugal, nia progresu tama ona iha 80% no ró ne’e bele finaliza iha 2024.
Nia esplika, delegasaun Timor-Leste ne’ebé kompostu hosi Xefe Estadu Maiór Jenerál F-FDTL Tenente Jenerál Falur Rate Laek, Eis Xefe Estadu Maiór Jenerál FALINTIL-Forsa Defeza Timor-Leste, Tenente Jenerál, Lere Anan Timur, iha fulan ne’e hodi bá partisipa loron proklamasaun Independénsia Moçambique ba dala-50 iha tinan ne’e, no delegasaun Timor-Leste hetan mós biban hodi hala’o vizita ba fatin konstrusaun Ró Haksolok nian iha Portugal.
“Ami ba partisipa loron proklamasaun independénsia Moçambique no depois ida-ne’e ha’u ko’alia ho Xefe Estadu Maior Jenerál Tenente Jeneral Komandante Falur, ami mós ba hala’o vizita ho kuriozidade ba fatin halo Ró Haksolok iha Portugal para hasai duni duvida iha Timór kona-ba Ró Haksolok, no hanoin liuhosi entrevista ida-ne’e ha’u hanoin katak halo Timor haksolok duni, la’os buatu ne’ebé ita rona katak Ró ne’e laiha ona no ferujen ona, ha’u atu dehan katak Ró Haksolok ne’e atu di’ak ona, ha’u bele dehan katak 2024 Ró prontu ona. No, na’in ba fabrika Ró Haksolok ne’e hateten ba ami katak dehan Ró Haksolok ne’e 80%”, Anan Timur, ba jornalista sira ho delegasaun sira hafoin fila hosi rai-li’ur iha Aeroportu Internasionál Nicolau Lobato Comoro, tersa ne’e.
Nia dehan, Ró Haksolok iha ema nia persepsaun la mai ona tanba la haree ho matan, maibé loloos sei iha prosesu konstrusaun.
“Ami na’in rua ba haree rasik Ró Haksolok, ne’e di’ak ona; ami la bosok ona. Ami katuas fuuk molik ona ita bosok malu mós lad’ak”, nia salienta.
Lere husu ba Governu atu haruka tán tékniku balun ba Portugal atu haree kle’an kona-ba onra Ró Haksolok, atu halo akompañamentu tanba Ró Haksolok ne’e kuandu finaliza ona sei hasae mai rai maran hodi hasai rai-henek sira iha ró-laran inklu presiza pinta molok hatuun ba tasi hodi mai Timor-Leste.
“Agora ita-nia tékniku to’o agora laiha ne’ebá, sé aban bain rua ró ne’e mai oinsá, agora problema Governu nia mós, primeiru Governu tenke haruka ekipa tékniku ba para haree ró ne’e. bele dehan katak 2024 ró tenke mai tanba ami haree ho matan”, nia konklui.
Jornalista: Natalino Costa
Editór : Zezito Silva
