DILI, 30 novembru 2023 (TATOLI) – Ministériu Edukasaun prega kompeténsia haat ba manorin 820 ne’ebé sai ona permanente tenke domina língua ofisiál portugeza no tetun, tenke iha koñesimentu sientífiku iha área ensinu, domina tékniku pedagójiku no iha étika profisionál.
Ministra Edukasaun, Dulce de Jesus, hato’o mensajen hirak ne’e, iha ámbitu tomada pose, ba profesór sira iha Dili no postu administrativu Ataúro hodi obedese ba kompeténsia hirak ne’e.
“Tenke kaer metin kompeténsia haat ne’ebé maka ministériu prega ona, nune’e bele sai nafatin profesór ne’ebé iha responsabilidade. Kompeténsia haat ne’e maka sai xave importante ba profesor ida-idak atubele hala’o misaun ho profisionál”, governante dehan iha salaun Oka, Hudi-laran, ohin.
Ba dosente sira ne’ebé goza ona rejime karreira tanba fó ona kontribuisaun iha tinan barak iha área edukasaun, ministra husu atu kontinua presta responsabilidade hodi lori prosesu aprendizajen ba alunu sira ho adekuadu.
“Ohin, tempu ona atu goza duni rejime karreira ne’e, maibé buat ne’ebé maka Nonu Governu, liuhusi Ministériu Edukasaun halo daudaun ne’e bele konsidera lavale liu kompara ho dedikasaun ne’ebé maka profesór 823 oferse ona ba nasaun ne’e. Nu’udar ema ne’ebé iha responsabilidade boot iha ministériu kontinua esforsu hodi hatuur direitu profesór sia-nian ho loloos, tanba rejime espesiál ne’e hatuur ona iha lei kuaze tinan 13 ona”, afirma.
Sekretáriu Estadu Edukasaun, Ensinu Sekundáriu no Eskola Téknika, Domingos Lemos, solisita ba profesór sira hotu katak estatutu maka muda husi kontratadu ba permanente, maibé papél dosente sira-nian kontinua la’o hodi prepara alunu sira atu sai ema ne’ebe kualidade, nune’e iha futuru bele sai estudante ne’ebé kompetitór.
Nia mós husu ba profesór sira ne’e atu kontinua serbisu hamutuk ho ministériu hodi dezenvolve edukasaun Timór nian ba futuru ida di’ak liután. “Tenke kumpre nafatin kompeténsia haat ne’ebé iha, nune’e bele sai profesór ida ne’ebe iha kualidade atubele gatrante progresu di’ak ba edukasaun”.
Emposada Inácia José Paulo promete katak sei esforsa hodi kontinua kumpre misaun nu’udar manorin ida, nune’e bele prepara estudante sira hodi sai ema ne’ebé iha kompeténsia. Tanba ne’e, ho mudansa estatutu ne’ebé ministériu fo ona ba nia hanesan konsiderasaun ida ba dedikasaun ne’ebé halo ona durante tinan sanulu-resin nia laran.
Nia agradese tanba Ezekutivu rekoñese ona manorin sira-nian papél no fo ona prémiu boot ida ba sira hodi sai profesór permanente atu goza rejime karreira ne’e.
Notísia relevante: Ohin, manorin kontratadu 820 muda estatutu ba permanente
Jornalista: Tomé Amado
Editora: Maria Auxiliadora
