Ohin, manorin kontratadu 820 muda estatutu ba permanente
DILI, 30 novembru 2023 (TATOLI) – Profesór hamutuk 820 iha munisípiu Dili, ohin, simu pose hodi muda sira-nian estatutu husi kontratadu ba manorin permanente. Serimónia ne’e sei realiza iha 16h00, iha salaun Oka, Hudi-Laran.
Ministra Edukasaun, Dulce de Jesus, informa katak dosente sira ne’e husi Dili, inklui Ataúro ne’ebé bele goza ona direitu ba rejime espesiál, tanba kumpre ona rekizitu sira ne’ebé maka ministériu fó sai katak mínimu tenke iha grau akadémiku baxarelatu no lisensiatura. Aleinde ne’e, sira mós pasa ona iha prosesu avaliasaun dezempeñu ne’ebé Ministériu Edukasaun (ME) no Komisaun Funsaun Públika halo ona ba sira.
Maske profesór sira ne’e hetan ona direitu atu hakat bá permanente, maibé konsege hamosu tiha polémika entre manorin no Ministériu Edukasaun tanba falta komunikasaun ba malu kona-ba serimónia pose ne’e.
Governante esplika dezentendimentu ne’e akontese iha edifísiu Ministériu Edukasaun iha kuarta loraik, tanba antes ne’e fó sai iha loron 21 novembru katak pose ba profesór 820 husi Dili no Ataúro ne’ebé tama ona ba rejime espesiál ne’e sei realiza iha loron 30 iha ME. Maibé, tanba iha alterasaun ba kalendáriu katak eventu ne’e muda ba salaun Oka, entaun manorin sira atu tuir ensaiu más laiha preparasaun maka sira halibur malu iha ministériu hodi husu klarifikasaun ba ministra sobre loron pose ne’ebé deside ona.
Ho situasaun ne’e maka Ministra Edukasaun, Sekretáriu Estadu Edukasaun, Ensinu Sekundáriu no Eskola Téknika, Domingos Lemos, no dirijente tomak realiza enkontru estraordináriu hodi hatuur fali desizaun ho loloos atubele responde ba preokupasaun profesór sira-nian.
Portavós manorin kontratadu, Adi Segurado, klarifika katak ho informasaun ne’ebé maka sira rona direita husi Ministra Dulce ne’e bele fó hakmatek ba sira, tanba tinan naruk sira hein atu hetan estatutu ida ho loloos no konsege to’o duni ona. Tanba ne’e, laiha ona dúvida ruma ba sira no kontinua prepara aan atu simu pose ne’ebé maka sei akontese iha 30 novembru.
Notísia relevante: Lista profesór ne’ebé elejivel ba rejime espesiál publika ona iha Jornál Repúblika
Jornalista: Tomé Amado
Editora: Maria Auxiliadora
