DILI, 23 novembru 2023 (TATOLI) – Totál profesór kontratadu 5.009 ne’ebé mak Ministériu Edukasaun (ME) no Komisaun Funsaun Públika (KFP) verifika ona nia dokumentu, 4.089 mak elejivel ba kontratasaun ba rejime espesiál no publika ona iha Jornál Repúblika.
Dadus profesór sira ne’ebé elejivel atu hetan sira-nian direitu ba rejime espesiál ne’e mai husi kada munisípiu no kada ensinu. Husi Aileu manorin hamutuk 158 mak nia naran publika ona, Ainaro 311, Ataúro tolu, Baucau 399, Bobonaro 446, Covalima 271, Dili 817, Ermera 549, Lautém 162, Liquiçá 224, Manatuto 163, Manufahi 297, Oé-Cusse 24 no Viqueque 265.
Ba kada ensinu mak husi Edukasaun Pré-Eskolar hamutuk 435, Eskola Bázika 2.742. Eskola Sekundária Jerál 559 no Eskola Tékniku Vokasionál 353.
Diretora Nasionál Rekursu Umanu ME, Anita de Jesus, hatete dadus sira ne’e hetan ona aseitasaun husi Funsaun Públika no halo ona públikasaun iha Jornál Repúblika.
“Verifikasaun ne’ebé ami halo ne’e finaliza ona no desizaun Komisaun Funsaun Públika nian mós hasai ona bazeia ba númeru 5824/2023/CFP ne’ebé fó ona aseitasaun hodi bele públika ona lista profesór 4.089 iha Jornál da Repúblika ne’ebé realiza ona iha loron 15 novembru 2023”, Anita de Jesus ba Tatoli iha Vila Verde.
Tuir nia, falta profesór kontratadu 920 ne’ebé mak nia dokumentu lapasa iha prosesu verifikasaun no ME no KFP sei halo reverifikasaun iha faze daruak. Tanba ne’e, nia husu ba profesór sira ne’e atu atu submete filafali dokumentu sira bazeia ba kritériu ne’ebé fó sai ona, nune’e bele tama iha rejime espesiál ba karreira dosente.
Tuir Dekretu-lei númeru 31/2023, 31 maiu, ko’alia kona-ba Estatutu Karreira Edukadór sira ba Infánsia, Ensinu Báziku no Sekundáriu (Estatutu Karreira Dosente nian) katak bainhira manorin ida atu hetan sira-nian direitu ba rejime espesiál tenke prienxe kritériu ne’ebé hatuur ona katak mínimu manorin ida tenke baxarelatu depois sei iha mós avaliasaun dezempeñu hahú husi tinan rejistadu 2021-2022.
“Ba profesór 920 ne’ebé seidauk hetan oportunidade ne’e, ami sei halo tan verifikasaun iha faze daruak tanba iha mós ita-nian manorin balun antes ne’e iha ona diploma lisensiatura no baxarelatu, maibé falta informasaun sira la hatama dokumentu. Entaun, ita kontinua loke oportunidade daruak ne’e atu sira bele lori direita dokumentu sira mai iha rekursu umanu atu ita bele lori bá rejista”, dehan.
Tanba ne’e, ME husu ba profesór 920 ne’e atu submete lalais sira-nian dokumentu tanba durasaun tempu ba verifikasaun ne’e to’o de’it dezembru.
“Ba profesór sira ne’ebé maka labele mai direita bele envia de’it dokumentu liuhusi eletróniku, nune’e ME ho KFP bele halo lalais prosesu ba sira-nian dokumentu”, adianta.
Relasiona ho rejime karreira dosente ne’e, diretora esplika antes ona katak ba profesór ida maka ninia diploma ne’e baxarelatu, nia sei hetan saláriu mensál $278 no ba profesór ne’ebé mai ho grau lisensiatura sei iha remunerasaun mensál husi $289.
Notísia relevante: ME no KFP verifika ona dadus profesór sira ne’ebé tama ba rejime espesiál
Jornalista: Tomé Amado
Editora: Maria Auxiliadora
