DILI, 05 dezembru 2023 (TATOLI) – Kordenadór ekipa traballu ba reforma justisa, Lucia Lobato, hateten Programa Nasaun Unidas Dezenvolvimentu (PNUD) sei halo rekrutamentu ba péritu nain lima ba reforma justisa, rekrutamentu ne’e sei finaliza iha fulan ikus dezembru tinan ne’e.
Lucia hateten, Governu servisu hamutuk ho PNUD hodi halo rekrutamentu ba péritu nain lima atu bele mai ajuda ekipa traballu hodi reforma justisa.
Nia dehan, péritu nain lima ne’e ninian funsaun mak sei servisu hamutuk ekipa traballu reforma justisa ne’ebé forma hosi IX Governu Konstitusionál hodi bele halo dignóstika ba autór judisiáriu sira hanesan Tribunál, Ministériu Públiku, Ministériu Justisa no autór judisiáriu sira seluk hodi bele fó informasaun atu péritu sira ne’e bele halo dignóstika ba setór nune’e halo rekomendasaun espesífiku ba Governu atu Governu bele di’ak liután seitór justisa iha Timor-Leste.
“Hanesan ha’u dehan ona katak rekrutamentu ne’e Governu husu apoiu ba UNDP no UPDP mak sei kontrata péritu nain lima. Informasaun ne’ebé ha’u rona hosi parte UNDP katak prosesu rekrutamentu ba péritu sira ne’e sei finaliza iha fulan ida-ne’e no dezembru péritu sira sei mai hodi hahú halo ona servisu”, Lucia Lobato hateten ba jornalista sira bainhira partisipa lansamentu relatóriu JSMP nian ba justisa lokál ne’ebé halo iha Fatuhada, tersa ne’e.
Nia dehan, péritu sira ne’e balun mai hosi nasaun unidus, balun ema Juiz internsionál, iha balun Prokuradór, balun Advogadu no balun espesialidade iha área direitu.
“Péritu sira ne’e sei mai servisu hamutuk ho grupu traballu reforma ba justisa ne’ebé forma ona hosi IX Governu ne’ebé kompostu hosi timoroan sira ne’ebé iha esperiénsia iha setór justisa, akadémiku, peskizadór sira no sira sei hamutuk halo ba entidade sira liuliu ita-nia autór judisiáriu”, nia dehan.
“Péritu no ekipa traballu reforma ba justisa halo diagnóstiku ho maneira entervista, rekolla dadus ba ita-nia autór judisiariu sira tanba husu ba ita-nia autór judisiariu tenke koopera ho ekipa tanba sira sei formulariza sira nia diagnóstiku hodi halo rekomendasaun konkreta ba Governu saida mak ladiak no saida mak presiza hadia iha ita-nia setór justisa”, nia adianta.
Nia dehan, péritu sira-ne’e sei mai iha fulan janeiru tinan oin no ekipa ne’e sei halo nia servisu, hahú hosi janeiru to’o fevereiru no marsu 2024, sira sei enkamiña relatóriu rezultadu diagnóstika ba setór justisa ba xefe ekipa traballu reforma justisa no xefe ekipa traballu mak sei submete ba Primeiru-Ministru IX Governu Konstitusionál hodi anunsia relatóriu ba reforma justisa.
Nia dehan, dezde Timor-Leste nian independénsia, Governu gasta ona millaun $50 atu dezenvolve setór justisa maibé setór kontinua la’o la di’ak.
Jornalista: Natalino Costa
Editór : Zezito Silva
