DILI, 11 dezembru 2023 (TATOLI) – Komandante Polísia Nasionál Timor-Leste (PNTL) Munisípiu Díli, Superintende Xefe, Orlando Gomes, hateten PNTL sei fó seguransa másima ba prosesu anúnsiu rezultadu ezame nasionál ne’ebé sei akontese iha tersa 12 dezembru.
“Aban, Ministériu Edukasaun sei fó sai rezultadu ezame nasionál iha territóriu nasionál, tanba ne’e, ha’u koordena ona ho Komandante Operasaun PNTL Munisípiu Dili hodi koordena ho Komandante Eskuadra sira atu fó seguransa másima ba prosesu anúnsiu rezultadu ezame nasionál, ho objetivu atu prevene asidente”, Orlando Gomes, dehan ba jornalista sira iha Unidade Espesiál Polísia (UEP) Bairro Pite, segunda ne’e.
Nia dehan, PNTL Dili sei fó seguransa másimu, hahú prosesu anúsiu rezutadu iha eskola to’o iha área sira ne’ebé estudante sira sei uza hodi halo komboiu (pawai).
Orlando afirma, PNTL identifika ona eskola sira ne’ebé mak sempre hamosu konfrontu iha tempu anúsiu rezultadu ezame nasionál.
“Ami identifika eskola iha área Dom Aleixo hanesan 10 dezembru no Finantil ne’e mak sempre mosu problema entre estudante ho estudante, ami sei koloka ami nian membru iha fatin atu prevene hodi labele mosu konfrontu”, nia dehan.
“Ami mós identifika ona fatin sira ne’ebé estudante sira uza hodi halo komboiu, ami sei koloka membru ba fatin sira ne’e hodi prevene asidente no insidente iha komboi estudante sira nian”, nia adianta.
Superintende Xefe husu ba estudante sira atu kuidadu aan, tuir regra tránzitu, hodi selebra rezutadu ezame nasionál no sei la tolera estudante kontra lei kódigu Estrada.
“Ita tenke kuidadu ita-nia aan, komboiu ba maibé tenke kuidadu aan, tanba ita-nian hakat ne’e sei naruk, nasaun presiza ita bo’ot, imi mak nasaun nia futuru”, nia konklui.
Jornalista: Natalino Costa
Editór : Zezito Silva
