COVALIMA, 13 dezembru 2023 (TATOLI) – Gabinete Apoiu Jurídiku husi Ministériu Edukasaun (ME) divulga pakote lejislativu haat ba kargu xefia sira, iha munisípiu Covalima.
Pakote lejislativu sira ne’e mak Estatutu Karreira Dosente ne’ebé define iha Dekretu-lei númeru 31/2023, Rejime Jurídiku Sistema Nasionál Ensinu Báziku iha Dekretu-lei númeru 32/2023, Rejimu Jurídiku Sistema Nasionál Ensinu Sekundáriu Jerál no Tékniku Vokasionál iha Dekretu-lei númeru 33/2023 no Rejimu Jurídiku Edukasaun Pré-eskolár iha Dekretu-leu númeru 34 /2023.
“Ami halo divulgasaun pakote lejislativu ne’ebé hetan promulgasaun husi Prezidente Repúblika ba diretór eskola sira iha munisípiu Covalima. Diretór eskola sira presiza hatene didi’ak sistema edukasaun iha Timor-Leste, enkuadramentu jurídiku, presiza hatene alterasaun pakote lejislativu, estabelesimentu ensinu báziku públiku no fahe kompeténsia entre nasionál no munisípiu”, Xefe Gabinete Apoiu Jurídiku, Olandina Ferreira, dehan iha Edukasaun Covalima, ohin.
Nia salienta katak iha sistema edukasaun Timor-Leste hanesan nivél pré-eskolár la’ós obrigatóriu prepara ba ensinu báziku, nivél ensinu báziku obrigatóriu no universal no nivél ensinu sekundáriu la’os obrigatóriu.
Modelu estabelesimentu ensinu báziku públiku tenke iha jestaun ida de’it no sentraliza iha eskola bázika sentrál no bazeia ba programa espesífiku ME nian.
Diretór Servisu Edukasaun munisípiu Covalima, Francelino Freitas, husu ba kargu xefia sira tenke rona, nune’e bele komprende kona-ba alterasaun lei sira.
“Lei sira ne’e importante, bainhira la komprende tenke husu pergunta, tanba sira mak atu aplika iha serbisu fatin”, nia fó hafoin.
Notísia relevante: Edukasaun Covalima identifika eskola 21 atu konstrui-reabilita iha 2024
Jornalista: Celestina Teles
Editora: Maria Auxiliadora
