DILI, 15 dezembru 2023 (TATOLI) – Ministru Justisa, Amândio de Sá Benevides, hateten Ministériu Justisa (MJ) sei instala servisu notariadu iha Portugal, Inglatera Irlándia no Korea iha tinan oin.
“Governu hanoin hela, tinan oin, sei instala servisu notariadu iha rai liur liuhosi destakamentu funsionáriu notariadu iha rai liur hanesan Portugal, Inglatera Irlándia no Korea atu sira ba halo atendimentu dokumentu ba ita-nia sidadaun sira iha rai liur dúke ita-nia ema iha liur tenke soe tempu hodi mai iha ne’e”, Benevides dehan iha sala Plenária Parlamentu Nasionál, sesta ne’e.
Benevides prefere sei sosa karreta tolu ba prizaun Becora, Suai, Baucau no Ermera hodi fasilita servisu Guarda Prizionál atu tula ema dadur sir aba tuir julgamentu.
Iha fatin hanesan, Primeiru-Ministru Interinu, Mariano Assanami Sabino, hateten destakmentu funsionáriu notariadu iha Korea, Englatera, Irlándia no Portugal ne’e importante tebes iha diskusaun orsamentu tanba sidadaun sira mós ba servisu iha rai liur hodi hatama osan osan mai Timor-Leste tanba ne’e mak Governu tenke fasilita traballadór sira ne’e atu labele la’o ba mai.
“Ami sei koordena para fó atensaun ba ida-ne’e, hodi tinan oin ita bele hahú instala servisu notariadu iha diáspora’’, nia afirma.
Orsamentu fiskál Ministériu Justisa 2024 nian ho totál $13.527.213. kompostu hosi saláriu no vensimentu ho montante $8.522, bens no servisu 3.869.046, tránsferensia públika la iha, kapitál menór $915.250 no kapitál dezenvolvimentu $220.725.
Diskusaun Parlamentu Nasionál ba proposta OJE Ministériu Justisa 2024 nian pasa iha faze jeneralidade ho votu afavór 45 kontra 3 no abtensaun 17.
Jornalista: Natalino Costa
Editór : Zezito Silva
