BOBONARO, 10 janeiru 2023 (TATOLI)-Polísia Nasionál Timor-Leste (PNTL) komandu munisípiu Bobonaro, orienta ona membru sira hosi Eskuadra Balibo, atu kontinua rekolla informasaun no evidénsia sira iha terrenu atubele identifika autór ne’ebé oho matebian Natalina dos Santos idade 58 iha aldeia Railuli, suku Cowa, iha loron-sábadu (06/01), tuku 20:00 kalan.
Segundu Komandante PNTL munisípiu Bobonaro, Superitendente Asistente Polísia Fasío de Jesus Lima, relata, hafoin akontese kazu refere to’o agora parte autoridade seguransa seidauk identifika suspeitu ruma ne’ebé suspeita envolve iha aktu refere.
Notísia relevante: PNTL Bobonaro husu komunidade mantein pás iha 28 Novembru
“Ita seidauk hatene motivu hosi kazu ida-ne’e, tanba saida maka vítima ne’e hetan kanek, ne’ebé ne’ebé prosesu investigasaun kontinua la’o hela, ne’ebé ha’u labele ko’alia tanba saida mak ema oho, maibé nafatin rekolla informasaun iha terrenu liuhosi orienta eskuadra Balibo, atu orienta OPS sira halo investigasaun iha fatin refere, atubele buka hatene sé loos mak envolve iha aktu ne’e,” nia ko’alia ha edifísiu Servisu Jestaun Merkadu Munisipál Bobonaro, kuarta ne’e.
Nia husu ba sasin sira atu fó informasaun ba parte investigasaun autoridade seguransa atubele identfika autór ba kazu ne’e.
“Deskonfia hodi katana mak tá, maibé loos duni hodi katana ka lae, iha prosesu autópsia mak bele define ida-ne’e será ke katana. Ita haree tá maibé tá ho saida,” Nia katak.
Adjuntu Komandante PNTL munisípiu Bobonaro ne’e haktuir, vítima nia isin mate, komunidade mak hetan ho kondisaun kanek, hafoin ne’e sira informa kedas ba postu destakamentu FALINTIL-Forsa Defeza Timor-Leste (F-FDTL) Hasnaruk, Cowa no kontaktu kedas ba Eskuadra Polísia Balibo hodi tún ba lokál krime.
“Deskonfia ema tá iha ninia ulun parte loos no tilun parte los nian no iha rentos parte karuk, kanek hosi situasaun ida-ne’e, ita la identifika suspeitu ne’ebé envolve, ne’ebé suspeitu ne’e deskoñesidu, parte investigasaun halo hela sira-nia kna’ar hodi halo ezaminasaun, hafoin submete ba prosesu autópsia,” nia katak.
Kazu omisídiu ne’e akontese iha (09/01) ne’e parte autoridade seguransa entrega ona mate isin ba parte família hodi prepara halo serimónia fúnebre iha matebian nia horik-fatin, hafoin konklui prosesu autópsia hosi Hospital Nasional Guidu Valadares (HNGV), Bidau, Dili.
Notísia relevante: PNTL Bobonaro husu komunidade mantein páz iha loron finadu
Jornalista: Sérgio da Cruz
Editór: Evaristo Soares Martins
