TURUSKAI, 11 janeiru 2024 (TATOLI) – Komunidade hosi Postu Administrativu Turiskai, Munisípiu Manufahi sente triste tanba kondisaun estrada ne’ebé ligasaun hosi Urahou to’o Mindelu grave totál.
“Estrada ne’e sai preokupasaun mai ami povu Turiskai, hahú kedan hosi Urahou tama mai to’o Turiskai-Vila liubá Mindelu ne’e grave los, ami husu ba Governu se bele tau matan netik mai hadia dalan ne’e, tanba dalan ne’e ami konsidera dalan istóriku”, komunidade Abril Pires dehan ba Agência TATOLI iha Turiskai, ohin.
Nia dehan, dalan ne’e konsidera dalan istóriku tanba Turiskai fatin moris Saudozu Prezidente Francisco Xavier Amaral no fatin mate Prezidente Nicolau Lobato iha Suku Mindelu.
“Ami preokupa tanba fatin ne’e fundadór nia moris fatin maibé to’o agora Governu nunka tau atensaun, ami la husu buat barak ami so husu hadia netik ami-nia dalan ne’e, tanba ema barak hakarak mai vizita ami nia fatin maibé dalan mak halo ema lakohi mai”, Abril hateten.
Iha sorin seluk, komunidade Maria Araujo husu ba Governu hodi hadia lalais dalan Turiskai nian tanba udan mai makas tan dalan balun sei kotu.
“Ami atu lori sasan ruma ba fan, hanesan produtu lokál maibé labele tanba dalan la di’ak, fatin ne’e ema dehan Avó Xavi nia moris fatin maibé Estadu nunka tau matan liu”, nia hatete.
Aleinde ne’e, komunidade Marcos Pires hatutan, maske dalan aat maibé nafatin iha esperansa ba Governu da-sia ne’ebé lidera hosi Primeiru-Ministru Kay Rala Xanana Gusmão.
“Ami fiar nafatin ba Governu ida-ne’e, tanba Avó Nana nia ema ida ne’ebé hatutan funu ne’e, tempu ida ba tempu ida sei hadia dalan ne’e, ami fiar nafatin ba Governu ida-ne’e”, konklui.
Turiskai kompostu hosi Suku 11 mak Aitumua, Binani, Beremana, Kaimauk, Foholau, Fatukalu, Lesuhata, Liurai, Matorek, Mindelu no Orana.
Jornalista: Hortencio Sanchez
Editór : Zezito Silva
